Kate-i’n tiara thar a khim chhuak

Kate-i’n tiara thar a khim chhuak
Kate Middleton chuan a vawi khat nan Queen Victoria Oriental Circlet Tiara a khim chhuak a, he tiara i arrard & Co. kutchhuak niin, lunghlu 2,600 leh lungmawi engzat a cheimawi a ni a, 1853-a Prince Albert-a’n a siam tir tawh kha a ni.
Princess of Wales, Kate Middleton hian December ni 3 a Windsor Castle-a state banquet-a a tiara khim chhuah tawh zinga lian ber hi khim chhuakin, he tiara hi tun kum 20 chhunga lal chhungkaw member ten mipui hmuh tura an khim chhuah leh vawi khatna a ni.
Kate-i hi he sorkar buatsaih zanriah eikhawmnaah hian a pasal Prince Williams nen an kal dun a, Jenny Packham kawrfual pawl inbelin a nalh zeih zawih khawp mai. Accessories lamah chuan a tiara bakah lunghlu bengbeh, Queen Elizabeth hnen atanga a rochun a beh bakah Royal Family Order sash a bat a, Royal Victorian Order star a kawrah a kilh bet va bawk.
Kate-i tiara khim chhuah hian chanchin a ngah riau a, a tirah chuan opal (lungmawi chi khat) hmanga chei a ni a, mahse, 1901 khan Victoria mo, Queen Alexandra-i’n puithuna eng emaw avangin ruby (lungmawi chi khat)-in a thlak tir leh ta a ni. Alexandra hian he tiara hi Germany an tlawh tumin vawi khat a khim chhuak tih loh chu a inbel leh ta lo niin an sawi a, Queen Mother-in rochunin, a fanu Queen Elizabeth II kutah a awm leh a, ani hian 2005-a Malta a tlawh tumin a khim chhuak a, chumi hnuah tun hi mipui hmuh tura an khim chhuah lehna hmasa ber a ni.
Tun tum state banquet hi German President Frank-Walter Steinmeier puala an buatsaih niin, King Charles III leh Queen Camilla te pawh zanriah kilnaah hian an tel.
Kate-i hian July thlaa French President Emmanuel Macron leh a nupui Brigitte Macron te an mikhual tumin Queen Mary tiara lar zet mai ‘Lover’s Knot’ a lo khim chhuak tawh a, September thlaa US President Donald Trump leh a nupui Melania te Windsor Castle-a an mikhual tumin a khim chhuak leh bawk.
Kate hian British lal chhungkuaa a lawi luh hnuah mipui hmuh turin tiara panga a khim chhuak tawh a, 2011-a an inneihnaa Cartier Halo khimin, Lotus Flower leh Strathmore Rose te a khim chhuak tawh bawk.