Kate Middleton-i tiara-in ngaihven a hlawh

Princess of Wales Kate Middleton chuan Prince William nena lal ruai kil tura an kalnaah Strathmore Rose tiara a khim chhuak a, he tiara hi lalnu boralta Queen Elizabeth II ta niin, 1930s hnua mipui hmuh tura an khim chhuah lehna hmasa ber a ni.
He tiara hi lunghlu a cheimawi niin, mit pawh a la hle a, November ni 21 zana Buckingham Palace-a ruai kilnaah a khim chhuak a ni. Kate-i hian a tiara mil turin Jenny Packham kawrfual var hain, a bengbeh pawh lalnu ro zinga mi tho a ni. Princess nih pawh a inhmeh viau e!
He ruai kilnaah hian a pasal Prince William leh King Charles III bakah Queen Camila te pawh an tel a, he lal ruai hi South Korea President Yoon Suk Yeo leh a nupui Kim Keon Hee te puala an buatsaih a ni.
Kate-i hian lal chhungkaw member a nih anga a teichhuahnaah tiara hi chi li chiah a la khim chhuak a, 2011-a William nen an inneih ni khan Cartier halo tiara khimin, he tiara pawh hi King George VI-a’n Queen Elizabeth II-i’n a nu hnen atanga a rochun tho a ni a, 2013-ah Lotus Flower tiara (hei pawh Queen Mother ta tho) khimin, he tiara vek hi 2015 leh 2022-ah te a khim chhuak leh tawh bawk.
Hei bakah hian nikum khan Lover’s Knot tiara a khim chhuak bawk a, he tiara hi a favorite niin an sawi a, tum li a khim chhuak tawh a, he tiara hi chu Princess Diana pawh khan a ngaina hle niin an sawi.