Kawl A Eng Dawn Nge?

Lalchhandama Colney
Ph-9862982321

Zan khawthim hi hrehawm leh harsatna, manganna sawi nan te kan hmang thin, chutih laiin kawl eng chu hlimna, lawmna lo intan tur sawi nan te kan hmang bawk thin. Tam tak chuan kan sawrkar hrawn tawh te engkimah sawiselna em em kan nei lo mai thei, thenkhat erawh chuan, ram hmangaihtu tak tak kan va mamawh em an ti vawng vawng ve thung bawk a. Ani taka kan ram chu ram hmangaihtu tak tak inti ten min lo hruai thin tawh a, mahse, a ngaihna an hre lo nge, an hmangaih tak tak lo, vawiin thlengin state rethei tak mai kan la ni reng a ni. Mipuite kan phun nuai nuai a, a sawt tawh thin si lo, mahse, hei kan inthlang leh ta a, tun tumah chuan roreltu duh ang kan thlang chhuak tawh ang em aw, nge ni, mipuite pawh hian inthlannaah chuan kan lungawilohnate kan theihnghilh ve leh mai thin zawk. Kan vote-te, contract hna, sum leh thil dangte a kan hralh leh mai si chuan nakinah kan chan ala chau tawlh tawlh dawn a ni. Hriin Min Nuai – Khawvel ram dangte ang bawkin Mizoram pawh covid hriin min nuai, tam takin an hna an chan a, sumdawngten sum tam tak an hloh bawk a. Hrisellohna chi hrang hrang ten min man belh bawk a, nunna chan pawh sang dawn lai kan awm a ni. Ni tin inhlawhfaa eizawng ten kut an dawh a lo ngai a, thil zuar thin ten an zuar thei tawh bawk si lo. Motor khalha eizawngte pawn an hna an thawk thei lo va, private office ang chi a thawk reng reng te pawn an hna an chan a ngai. Hmun tin maiah hri kai enkawl an ngai, pawisa lo ngai zel si, sawrkar pawn a tih hleih theih loh hun alo awm ta a. Kan sawrkar au-hla ber chu hri vangin engmah a tih theih loh, sum leh pai kan harsa, tih chu a ni ta ber mai. State rethei nihsa nak alaiin kum hnih ngawt mai chu engmah thawk thei lovin min phuar chu alo ni reng mai. Ramdang ang bawkin kan economy chuan a tuar ve hle turah ngai ila. Ngaiawh chho leh tur chuan kan beih fat fat a ngai ngei ang.
I |awngtai Ang – Ram hruaitu tha leh tha lo inkar hlatzia chu kan hre theuhin ka ring. Manick Sarkar (Tripura CM) ni thin a chanchin kan hre theuhin ka ring, chutiang bawkin Nitish Kumar, Bihar CM te pawh sawi ta zel ila, kan hmaih hauh loh tur chu Delhi CM Arvin Kejriwal-te pawh. Ram pawn han sawi thleng ta ila, Ukraine ram hruaitu Zelensky-te pawh, ani hi awm lo se emaw ram hmangaihtu tak tak ni lo se chuan vawiinah Ukraine ram chu sawi tur a awm tawh lovang. Miin ram a hmangaih tak tak a, a nunna hial pawh a phal chinah hi chuan, a tawi zawngin sawi ta ila, Pathian pawh hian a hmuh hmaih duh lo reng reng, a hre reng zawk thin a ni. Aw le, keini pawh kan inthlang, ram hmangaihtu eng emaw zat an rawn in-candidate a ni, an hmangaih tak tak leh tak tak loh chu rei lo teah a lang leh mai dawn a ni. Engpawhnise, tuna kan tih theih tawk awmchhun chu Pathian hnena tawngtaia ram hruaitu tha dil a ni deuh ber mai. Sawrkar Thar – Vote kan thlak zo tawh a, rei lo teah sawrkar thar kan nei dawn. Party ngai nge, midang, tute nge ni dawn, tih chu kan inrinsiak laih laih hun lai a ni e. Tu party pawh lo sawrkar se thawhpui thei turin i inbuatsaih ang. Eng ang sawrkar nge ni ang aw, kan ram chu min intodelh pui tawh dawn nge, ram hmangaihtu tak tak an nih chuan kan vannei hle dawn a ni. Sawrkar hi tha tak a awm thei a, tha ve mai mai a awm thei bawk a, tha lutuk a awm hlauh thei bawk a ni. Sawrkar tha lutuk hi chu a awm ngai mang lovin ka hria, kalphung pangngaia kal, tha em em lo, chhe em em chuang lo hi an ni duh tlangpui khawp mai. Party ngai pawh lo chak leh ta se kalphung danglam deuh, thil thar la rawn ti chhuak tur te in han beisei ila. Thil hi a eng zawnga thlir a tha an ti a, keini Zoram mipuite paw’n sawrkar thar tha tak mai nei turin inbeisei ila, a lo nih loh tak leh kan tlakna a sang deuh tal ang chu.
Kan ram chu ram hmangaihtu tak tak inti ten kum tam tak min hruai tawh a, mahse vawiin thlengin eng he hu kan la ni thei lo. Tun sawrkar thar turah hian eng nge kan an ang aw, hetih lai hian mipuite pawh hian thil hi kan chik lutuk bik lo, kan ngaihtuah thui vak lo thin, kan lungawina hi a ho leh riau thin, a tawpah an eiru zo vek, kan ti leh ringawt thin. Awle, eng pawh nise, mipuite chuan hruaitu tha an mamawh, kawng dika hruaia intodelh turin. Zoram mipuiten i thlir dek dek teh ang – Kawl A Eng Dawn Nge? beisei takin.