Buichali leh Sairang inkar kawng siam/hat hna an thawk mek a, mahse a la tha tak tak lo, hmasawnna a awm thei tak tak lo tih thu dawn a ni.
Mizoram Truck Owners Association hruaitute’n Ningani khan kawng siam mek hi an en a, a la chhia a, tlan a la har an ti.
Kar hmasa lam khan Mizoram Truck Owners Association leh Mizoram Truck Drivers Association te’n kawng hi a chhe zual lai siamthat a nih loh chuan May ni 23 atanga tlan loh an tum thu an puang a, sorkarin siam a nih tur thu an sawi avangin truck hi an ding ta lo. A siamtu lamin hna an thawk ngei a, mahse eng vak a ang thei lo tiin truck neitu pawl hruaitute chuan an sawi.
A siam hna hi an thawk a, mahse lirthei a tlan reng a, hna hi an thawk chak thei lo a ni, an ti.
Mizoram Truck Owners Association leh Mizoram Truck Drivers Association te hian kawng siam hna a chak theih nan kar hmasa Inrinni atangin zing dar 9 atanga tlai dar 5 thleng tlan loh ni se an ti a, chuti chungin lirthei tlan a tam tih an sawi.
Truck an tlan loh nana lo duty turin Sairang police te an ngen a, chuti chung chuan truck a tlan a, lirthei dang an lo tlan lo thei lo bawk nen, hna a chak thei lo nia a lan thu an sawi a, kawng hi a la chhia a, tlan a la har an ti.
“A chhe zual laiah lung an vawm khawm a, chu chu tuna an siam dan ber chu a ni. A la chhia a, mahse tluk hlauhawm kha chu a ni tawh lo a, a hma angin tlu pawh an awm tawh lo niin kan hria. Mahse a tlan chak theih loh a,” truck owners association hruaitute chuan an ti.
Inrinni hian PWD minister leh home minister te nen kawng siam hna thawh mek hi a hmuna en an tum tih an sawi a, Sairang police te pawh ngen nawn an tum tih an sawi bawk.
Kawng a la chhia, tlan a la har
Get real time updates directly on you device, subscribe now.