Kawng chhe zual siam turin inruahman dawn

Kawng chhe zual siam
turin inruahman dawn
Buichali leh Sairang inkara kawng chhe zual siam turin kawng siamtute chu truck neitu leh a khalhtu lamte nen inrawnin hma lak a ni dawn.
PWD minister Vanlalhlana hoin Buichali leh Sairang inkara kawng chhe zual lai chu PWD, NHIDC, Mizoram Truck Owners Association leh Mizoram Truck Driver’s Association aiawhten Nilaini khan a hmunah an enfiah a. Minister hian National Highway 06 chu Mizoram chak lakna kawngpui pawimawh a nih angin, engtik lai pawha lirthei zawh tlaka siam a tul tih a sawi.
NHIDCL hotute chu mipui, a bikin lirthei hmanga eizawngten harsatna an tawh dan hrilhfiahin, tun aia chak lehzuala kawng siam hna kalpui turin a chah.
Kawngpui enhonaah hian hmun 20 dawnah truck lian tana zawh harsa khawpa chhia a awm tih hmuh a ni a. NHIDCL, MTOA leh MTDA chuan May 23 atanga sawt lehzuala kawng siam hna kalpui a nih theihnan an inrawnkhawm tur thu an sawi. Lirthei neitu aiawhte hian chak zawka kawngpui siam a nih theihnan kawng siam chhung, zing dar 9 atanga tlai dar 5 thleng lirthei din tir an inhuam tih an sawi bawk.
MTOA leh MTDA hian kawng chhe zual hi siam a nih loh chuan truck din tir an tum tih an lo sawi tawh a ni.