Kawng chhiain mipui nghawng telh telh

Kawng chhiain Mizoram a tibuai a, a nghawng a na telh telh. Kar hmasa lamah mipui a nghawng tawh a, tun karah a nghawng na zual.
Mizoramin bungrua a lakluhna kawngpui pawimawh, Vairengte leh Aizawl inkar kawng a chhiat avangin kar hmasa leh chumi hma chawlhkarah bungrua a thleng mumal lo a, bungrua a thlen tlem telh telh avangin tun karah hei hian ni tin khawsak a nghawng tawh hle.
Kar hmasaah khan Aizawlah bawnghnute (amul) lei tur a awm meuh lo a, tun karah kawng chhiaa tang lirthei pahnih khat an tlang theih avangin lei tur tlem azawng a awm leh. A laluttute’n a zuarte hnenah an sem rual a, sem tur a awm lo zui leh tawh.
Tel pawh a vang a, mipuiin an hman tlanglawn chu kar hmasa atang khan a vang tawh. Dawrkaite chuan chini a vang tan an ti a, naute hnute te, purun te, arham buhfai te pawh a hma angin duh ang zat lak tur a awm lo an ti.
Kawngpui hi Kawnpui leh Khamrang inkar a chhe nasa a, Kawnpui atanga Lungdai lama tlan lirthei thenkhatin bungrua an phurh luh, tam tham vak lo chu a awm thin.
Tun hnaiah ni tin mamawh thil thleng thar hi a laluttute’n hmun hrang hranga a zuarte hnenah inrualkhaiin an sem thin a, thil thenkhat chu a zuartute’n intlarin an chang thin bawk. Tun hnaiah pawh cigarette zuartute chu thui zet mai an intlar.
Online hmanga bungraw chahna lam pawh a nghawng a, tunlai hi ‘discount’ awm lai a ni na a, Mizoram atangin bungrua a chah hleih theih loh.
Kawng chhiaah bungrua a tlang thei lo a, online hmanga bungraw chahnate pawhin hna an nei meuh lo. Bungraw chahnaah hian ‘pin’ a awm a, Mizoram ‘pin’ hi an block fo. Bungraw semtute eizawnna a nghawng a, bungraw sem tur an neih loh avangin an sum lakluh a nghawng mek.