Kawng chhiat vangin bungraw phurtute buai

Mizoram kawngpui pawimawh, Silchar leh Aizawl inkar kawng, Buichali leh Sairang inkar kawng a chhiat avangin bungraw phurtu lirtheite’n harsatna an tawk a, kawng siam hna a chak theih nan Inrinni aanga tlan loh rih an tum.
Mizoram Truck Owners Association leh Mizoram Truck Drivers Association te’n sorkarin kawng chhe zual lai a siam lo a nih chuan May ni 23 aanga tlan loh an tum a, sorkarin siam a tum avangin, hna a chak theih nan lirthei neitu leh a khalhtute’n lo chawlh rih an tum ta a ni. Nuar an nih loh thu an sawi a, kawng siam hna a tluan theih nan leh a siamtute’n chak taka an thawh theih nana lo din rih tum an nih thu an sawi.
Mizoram Truck Owners Association te’n an sawi danin, Buichali leh Sairang inkar kawng khawihtu tur an awm lo a, Buichali leh Khamrang inkar kawng siamtu contractor BR Goyal-in a chhe zual lai an siam dawn, hei hi sorkarin a ngen vang a ni.
Truck neitute chuan kawng a chhiat avanga harsatna an tawh nasat thu an sawi a, nikum October thlaah he kawng hi a chhiat avanga an lo tlan loh tawh thu, khang lai ai khan tunah a chhiat zawk thu The Aizawl Post an hrilh.
Truck a tluk nasat thu sawiin an hruaitute chuan, ‘Ni tin chuan a tlu bik lo a, mahse a tlu a tam ni chu a awm,’ a ti a, lirthei a tluk loh pawhin kawngah an thang rei thu a sawi.
Truck neitute chuan sum leh pai lamah pawh an tuar nasa tih an sawi a, a tluk loh pawhin a inelh nasat avangin a spring leh differential a tliak fo tih te, a tliak em lo a nih pawhin a tlo loh phah a, chung chu Silchar-a siam te a ngai a, an tan a hautak tak zet tih an sawi.
Kawng chhiatzia ngaihtuah chuan tlawmngaih chhuaha tlanah an inngaih hial thu te pawh an sawi a, Mizoram kawngpui pawimawh a nih avangin sorkarin ngaihsak se an duh thu an sawi bawk.
Truck neitute leh a khalhtute hi nikum October leh kumin January-ah kawng a chhiat em avang hian an lo tlan lo tawh a ni