Kawng dik zawh Durtlang North

Ningani zan Ather Pro Volleyball League-ah set thum set hniha an elpui Chhinga Veng Spikers hnehin Durtlang North-in semi-final lut thei turin rahbi pawimawh an tuk.
LPS Arena, Falkland-ah Johan Vanneihsanga’n point 30 chuang thawkchhuakin set hnih set khata hniam tawh Durtlang North a hruaikir a, 28-26, 27-29, 22-25, 25-20, 15-6-in an chak.
Knockout round inhlangkai turin team pahnihin chak an mamawh a, inhnehtawk taka set nga an inkhelh hnuah 2022 champion Durtlang North-in point hnih hmuin Chhinga Vengin point khat an neih belh ve thung.
Khelh khat la awmah Tuichangral leh Hunthar an tlang tawh a, semi-final lut thei hniam ber palinaah Durtlang North insawhnghetin point nga an kawl a, an chung chiaha awm Thutak Nunpuitu Team aiin point khatin an hniam.
Panganaah Spikers inhungin point thum an hmu a, May ni 20 zanah league kharin a mawnga awm Hlimen nen an inkhel dawn. A tuk zanah league zawh a ni dawn a, Durtlang North leh Hunthar an inhmachhawn ang.
Johana’n vawi 32 vaw tlain point 12 a hloh a, a vawi hnihna’n Kuriz Player of the Match-a thlan a ni a; ball rang vawtu Thangminlal Guite chuan point 21 hmuin 13 a paih a, inelna nasa tak karah Durtlang North-in set khatna an la.
Thanga’n vaw tlain 27-26-in Durtlang North an sang a, vawihnih an deuce hnuah an tlang. Set hnihnaah vawithum an deuce leh a, 27-26-a sang zawk an nih laiin Johana’n a vaw kai lo a, Chhinga Vengin an nihrual hnuah Durtlang North-in point hnih an hloh zawn a ni.
Spikers-in state dang atanga an lakluh Yougank Baliyan chuan point 34 hmuin 14 a hloh a, set thumnaah a vanglai hmangin a vaw tla hnem hle a, a hlap tlak hmangin 23-19-in hma an hruai. Durtlang North an bet a, point 20 chiah an hmu ve hman tihin lehlamin set an la zawn.
Set lina atangin Durtlang North-in danglamna siam thei player an ngah zawk tih lantirin kawng dik an zawh a, state dang atanga an lakluh Shashank Kandpal chuan an inkhelh chhungin vawi 13 a vuak tlak laiin point 10 a hloh a, rin tlak tawk lo mah se Mizo player-te’n hriam takin an khel.
Chhinga Vengin Yougank an chhawr rimin an innghat nasa a, a zuan hnem avangin a tlahniam a, a vuak sual bakah an dang fo bawk.
Durtlang North tan H. Malsawmsanga’n an inkhelh chhungin point nga a hloh laiin 19 a hmu a, a vuak tlak hnuah 15-15-in Spikers an nih rual a, an kalsan zui nghal.
Yougank leh Lalchungnunga vuak an dansak zawn hnuah Chhinga Veng talbuaiin 24-20-in Durtlang North an sang a; Sawmsanga’n hlap tlain a vawi hnih nan set an la a, lehlam nih ruala phurna an insiam belh laiin Spikers an zuai.
Set hnuhnung berah Johana’n a hlap tla tam a, Thanga’n lehlam vuak dang ve thungin inkhel an thunun hneh hle a, point khat hmuh belha chak turin 14-4-in Durtlang North an sang.
Spikers-in point hnih an hmuh zawn ve leh hnuah Sawmsanga’n vaw tlain hnehna hlu tak an chang.
Mizo player-te’n an theihna tha taka an lantir avangin Durtlang North tan a lawmawm lehzual a; Johana, Thanga leh Sawmsanga bakah Vanlalthuama’n vawi 10 vaw tlain point khat chiah a hloh a, Shashank aiin an thawhhlawk vek a ni.
Yougank tih loh Chhinga Veng player-te an inchetthat chhawk a, Lalneihpuia Hrahsel chuan point 15 hmuin point sarih a hloh laiin Thangzika Pautu chuan point thum paihin point 10 a hmu a, TNT an hneh tuma chetha Lalramhluna’n vawi 11 vaw tlain tum riat a tisual a, Chungnunga’n point nga a hmuh aia tam point ruk a paih.