Kawng hlauhawmah thihna Hmundang pawh hlauhawm

Kawng hlauhawmah thihna
Hmundang pawh hlauhawm
Zemabawk leh Seling inkar kawng siam chu a nal tih sawi a ni fo a, two wheeler tlu leh lirthei dang tlan vir zawk zawk an awm thin thu sawi a ni. Chu kawngah chuan Thawhlehni khan two wheeler a tlu a, nunna chan an awm.
National Highway.02 Aizawl – Tuipang kawng laih zauh mekah April 15 zing dar 4.45 khan bike pakhat a tlu a, bike-a chuang Angely Ramngaihawmi (18) d/o J Lalrosanga, Thingsulthliah chu anmahni tawk zawnga truck full load tlanah inbarh lutin ka chhawn lohin a thi. Bike khalhtu Thangrema (22), Ngopa, tuna Zemabawka cheng mek chuan hliam tenau a tuar bawk.
Thudawn danin Angely hi a HSLC certificate siamthat ngai awm siamthat tir tuma Thingsulthliah atanga Aizawl pana rawn zingchhuah an ni a, Thawhlehni tuk ruah tlak lai khan helai chhoah hian tlanin, Zemabawk Tawngtai Mual thlang, Forest checkgate bulah an chesual palh ta a ni.
Truck hi MZ-01 Z 0166 a ni a, a khalhtu hi hnamdang niin, truck neitu pawh Silchar lam mi hnamdang nia thu dawn a ni. Chetsual lai vel hian truck khalhtu hi a lo tlanbo hman tih sawi a ni bawk.
Tuna chetsualna thlenna bulhnaia chengte chuan helai bawrah hian lirthei chesual an tam tawh hle a, an lo chhinchhiah chinah 40 an tling tawh. An chhinchhiah lem loh nen phei chuan 50 chuang a nih rin a ni.
Two wheeler tlu leh tleng, LMV tlan vir zawk zawk an awm fo a, a hlauhawm an tih avang hian social media lamah pawh an thiam leh theih ang angin an lo thehdarh ve tawh thin tih an sawi.
Helai kawng siamah hian kawngpui khawk /khi a tui lut tlang theih loh chi ‘bitumen’ hman nia an hriat thu sawiin, chu chu a tinaltu nia an hriat thu an sawi.
Hetiang bawk hian Sihphir leh Seling inkar kawng siam tharah pawh lirthei chesual/ tleng an awm nual tawh a, helai kawng hmangtute chuan enfiah ran nise an duh thu an sawi a ni.