Kawng hmanga sum siam thu sawi thin kha sum hmangin kawng siam ta

Kawng hmanga sum siam thu sawi
thin kha sum hmangin kawng siam ta
Tunhmaa kawng hmanga sum siam thin nia sawi chu, tunah chuan sum hmangin kawngpui siam a ni ta tih PWD minister Vanlalhlana chuan a sawi.
Thawhtannia ZPM party office-a inkhawmah Vanlalhlana chuan khaw awm danin a zir chhoh tak avanga kawngpui siamthat hna an thawk thei ta chu lawmawm a tih thu a sawi. Kum dang zawng aia fur a nat avangin sawrkar chuan theihtawp chhuah mah se, khaw awmdanin a zir loh avangin chak takin hma an la thei loa, chuti chung chuan an theih ang angin hmun hrang hranga kawng chhiate a theih anga thawmthat a ni tih a sawi.
“Theihtawp kan chhuahna hai derin eptu party-ten politics-a inbeihnan an hmang a, khaw tha min pe thei bik lote khan kawng tha pek an phut a, amaherawh chu mipuiin min hrethiam hlein ka hria a, lawmthu ka sawi a ni,” a ti.
Tunah chuan khaw awm danin a zir chhoh tak avangin chak zawkin kawng siam hna an thawk thei ta tih PWD minister hian sawiin, “Tunhma chuan ‘kawng hmangin sum an siam’ tih tawngkam kan hre thin a, kalphung thar mipui sawrkar hnuaiah chuan sawrkar sum dik taka hmangin kawng siamthat hna kan thawk mek a ni. Heti chung hian eptu party lam chuan phunnawina leh sawisel tur an la zawng zel a, nimah se, mipuiin ZPM ministry-ah rinna an nghat nghet a, keini pawhin theihtawp kan chhuah zel dawn ni,” a ti.