Kawng siam tur leh tuialhthei titlawm turin sorkar ngen dawn

Lirthei hmanga eizawngtu pawl hrang hrang intelkhawmte’n chief minister leh mi pawimawh dangte hmuh an tum a, kawng chhia siam tur leh tuialhthei man titlawm tura ngen an tum.
Lirthei hmanga eizawngtu pawl hrang hrang 11-te inzawmkhawmna Mizoram Commercial Vehicle Union te chu kar hmasa Zirtawpni khan an thukhawm a, kawng chhia siam tur leh tuialhthei man tilawm tura thuneitute ngen hi an rel a ni.
Mizoram chhung kawng chhe lutuk avangin khaw hrang hrang maxicab service pawh an tlan theih tawh lo a, thla khat chuang ding tawhte leh Mizoram mamawh chakkhai lakluhna kawngpui oawimawh Kawnpui-Sairang chhe lutuk te, Aizawl khawpui chhung kawng chhe lutuk te avanga motor chhia a tamzia leh harsatna kan tawh chungchangah kawng siam turin ngen ni se an ti.
“Oil man sang, diesel leh petrol man sang hi Rs 5 ve vea tihniam leh tura ngen ni se,” an ti bawk.
Chief minister leh sorkar mi pawimawh dangte hmuh an rel a, an thil ngen tum zingah lirthei chhiah chungchangah grace period siamsak leh turin tih te, Vehicle Tracking Device leh emergency button te passenger phur lirthei, 2029 January ni 1 hma lama mi-ah chuan tihluihna ni lovin a neitute duhthlanna ngen ni se tih te a tel.
“Assam atanga private motor, inter-state permit nei lova Mizorama passenger rawn phur thinte leh Mizoram atanga phur chhuak thinte chungchang transport department-a an thlen tawhin awmzia a neih loh avangin kan thiam angin hmalak kan tum a ni,” an ti.
“India ram khawpui metropolitan city-a an hman ang transport department-in automated testing device hman an tum hi keini ang state rethei leh intodelh lo tan chuan hman loh ni se kan ti,” an ti bawk.