Kawng siamthat har vanga harsatna
kan tawh turah sawrkarin ka ‘warning’
– Dr K Beichhua
Mizoram châk lakna pui ber kawngpui siamthat har avanga furpui thlen huna harsatna min siam nasat dan tur ngaihtuahin state sawrkar chu cherang turin ‘warning’ a pe duh tih MLA Dr K Beichhua chuan a sawi.
National Highway No.6 an tlawhnaah kawng a chhe hle a, hmun thenkhatah phei chuan an hmaa lirthei tlan an awm chuan a khuk lutuk avangin kawng an hmu thei lo tih BJP State Core Group member ni bawk Dr K Beichhua hian a sawi a. Opposition MLA ni mah se, sawrkar chu a pawng a taka do ngawt leh sawisel ngawt chu an tih tur a ni loa, constructive opposition MLA an ni a, Mizoram sawrkar pawh kawngpui siam chungchang leh state hmasawnna atan chuan theihtawp chhuaha puih an inhuam tih a sawi.
“National highway kawng dinhmun kan en atanga ka rilrua lang chu, Titanic lawng lian a pil hma khan hmalamah vur tlang sut tur a awm thu vawi thum lai an hrilh hnu ah pawh an ngaihsak tha duh loa, chhiatna nasa tak a thleng ang khan, Mizoram châk lakna pui ber kawng kan enfiah atanga langchiang chu, khulai kawng khu tun ang mai maia an ngaihsak lo a nih chuan, vur tlang sut ang tho khan Mizoram mipui hian kawng chhiat avangin nasa takin harsatna kan tawk dawn a ni tih a chiang. Kan hmalamah vur tlang lian kan sut mai a hlauhawm a, state sawrkar hi warning ka pe duh. Mizoram mipuiin harsatna lian zawk kan tawh lohnan khawngaih taka kan thurawn pek hi awih a, hma min laksak turin kan ngen a ni,” a ti.
Mipui lam pawhin thal lai a nih vanga ngawi mai mai loin, fur laia kan ngaihpawimawh ang aia nasa zawk hialin kawngpui siamthat a nih theihnan sawrkar au eih turin an insawm tih a sawi a ni.
Mizoram mipuiin BJP chu political party pakhat, ZPM, MNF, Congress te ang tho an ni tih hre mah se, inanlohna an nei tih BJP MLA hian sawiin, “BJP chu manifesto anga mipui tana hna thawk thin party kan ni,” a ti.
Kawng siamthat har vanga harsatna kan tawh turah sawrkarin ka ‘warning’ – Dr K Beichhua
Get real time updates directly on you device, subscribe now.
Next Post