TKP Inkhawmpui atan inbuatsaih zel

February 13-16 chhunga Lunglawn Mual Lungleia neih tur Mizoram Thalai Kristian Pawl (MTKP) inkhawmpui vawi 48-na atana pandal sak hnatlang chu kalpui mek a ni.
Inkhawmpui pandal structure hi BCM Hqrs ta, alluminium alloy structure cheng nuai 150 man hman a ni a. Structure awmsa hi duh aia a tet deuh avangin tihzauh belh tura ruahman niin, inkhawmpui pandal-ah hian mi 8000 – 9000 vel leng tura beisei a ni. Inkhawmpui pandal zau zawng hi a dung feet 230 leh a vang feet 184 tura duan a ni a. Tunah hian pandal hi pum tawhin, pandal extension hi ceiling siam tura ruahman a ni bawk.
Pandal sak hna hi Lunglawn bial TKP-in a inchhawka an neih bakah Lunglei khawpui chhunga Pastor bial hrang hranga unit hrang hrang leh kohhran pawl hrang hrangin chhun zanin a inchhawkin hnatlang an thawk a. Haulawng bial TKP-in pandal sakna atana mamawh dap chik sa truck trip khat an thawh a. Lunglei South bialtu MLA Lalramliana pawhin pandal panna kawng cheibawlna atan thil tul hrang hrang a ngaihtuahpui tawh a ni.
Lunglawn Pastor bial hian inkhawmpui senso atan cheng nuai 70 an ruahman a. Inkhawmpui thupuiah hian “Pathian hnaih rawh u” (Jacob 4:8) tih hman a ni ang.