Kawng thawmthat chinah JAC a lungawi thawkhat
Sairang leh Vairengte inkar kawngpui chhe zual lai thawmthat mekah hna thawh tawh chinah a lungawithlak viau tih Joint Action Committee for Pliable Road chuan an sawi a. Hetihlai hian siam zawh vek hmaa thuneitute nawrna avanga lirthei lianin an zawh lehnghal chu pawi an tih thu an sawi.
The Aizawl Post-in a zawhnaah JAC hruaitute chuan kawng chhe zual lai thawmthat hna thawh chu a lungawithlak thawkhat a, ni hnih khat chhung chauh pawhin rit phur lirthei lian tluk hlauhawm zual chu an hnawh zo thawkhat a, working season a intan chho hrim hrim tawh bawk nen, thawktute pawhin an beingawrh ve viaua an hriat thu an sawi a ni.
JAC for Pliable Road hian thuchhuah a siam a. Kawng tha neih theihnana lirthei lian ding riha hna chak leh tha zawka thawh a nih theih nan tiin, eizawnna khaihlak huamin kawng siam turin sawrkar an ngen a. Chief minister pawhin pawmpuiin chak zawka siam a nih theih nan thawh ho tha an ti tlang a, PWD leh NHIDCL lam chak taka hma la tura a hrilh nghal avangin CM chungah an lawm tih a sawi.
Chak taka hna thawh a nih theih nan tlaivarin an duty tih JAC hian a sawi a. Hnathawk tibuai thei tur leh hnathawh laklawh lai tih chhiat leh mai theihte venpuiin, hnathawktute pawhin chak takin an thawk thei chu an lawm hle tih a sawi bawk.
Hetihlai hian MLA inthlan hun puan a nih tak avanga harsatna awm theiah Kolasib DC leh SP ten kawng dan titawp tura an nawr avangin kawng hi an dang tawh loa, an duh dan hrethiam ve pha lo state dang lirthei lian an lo lut lo thei ta loa, hei hi JAC chuan pawi a ti hle tih sawiin, kawng thawmthat hna thawh hleihtheih loha awm a, kawng tha kan nei thei ta lo a nih chuan JAC chuan pawi a ti hle dawn tih a sawi. Mipui mamawh phurtu lirthei liante an tlan hleithei leh ta lo a nih pawhin JAC chuan a mawhphurhnaah a ruat thei tawh dawn lo tih a sawi bawk.
Thudawn danin, Bilkhawthlir – Kolasib bakah Kawnpui to Buichali Road huamchina kawng thawmthat tawh hi metre 500 chuang a ni tawh a. Sairang hnaiha kawng chhe zual metre 80-a sei lung phah a ni tawh a, concrete-in kawng chanve meter 22.5 chhun a ni tawh. Hmun hrang hrang atangin lung phurh thlen belh zel a ni bawk.