Kawnglak hotel leh a behbawm…
Sawrkar laipui Ministry of Jal Shakti hnuaia Department of Drinking Water & Sanitation leh Ministry of Tourism tangdun chuan India rama khualbukten thianghlimna leh hriselna kawnga hma an sawn theihnan an chet thianghlim dan thliarhran, Swachhata Green Leaf Rating kalpui turin a ruahman a. Hei hi Mizoramah pawh district level committee hmalaknain buaipui mek a ni; hmasawnna tha tak thlen ngei se a duhawm hle.
Hotel/homestay/restaurant etc. te hi bawlhhlawh sawngbawl kawngah chuan hma an sawn ve ta viau; hei hi a lawmawm rualin tanlakna tur erawh a la tam. Chutih ruala thil pawimawh tak, pawn lam lan mawina aia pawimawh zawk chu, ei leh in sawngbawl leh vawn thianghlim lam hi a ni.
Mizoram chhunga kawnglak hotel-a chaw ei thin chuan, hotel-a chaw leh chawhmeh an chhawp dan hi kan hre hlawm awm e. Hotel thenkhatah chuan dawhkan pakhat kila thu khualzin mi pali/panga vel ei tur chawhmeh hrang hrang kha hmun hnih khatah an chhawp tawrh a, chu chu an inban tawm ta thin a. Khualzinte ei bang kha paih mai lovin, chawhmeh belah an chhung lut leh mai a, chu chu dawrtu midang an lo kal hunah an lo chhawp leh mai a. Kawnglak hotel tam zawkah chuan hetiang system hi an la hmang a ni.
Sawifiah hranpa vak a ngai lo, kan hrethiam tlang vek. Hetiang system hi hriselna atana a that loh turzia chu a lang vek a ni. Khualzinte hi a huhova kal zingah pawh, taksa hriselna inchen lo tak tak, a ruka bawrhsawmna nei te pawh a awm theih a, hetianga eitur chhawp chhuah hi a mawi lo ni satliah mai lovin, tenchhiat dan te pawh a inchen lova, natna inkaidarh theihna chance pawh a sang bawk.
Thil dangah, hmuh theih lamah lang fai viauin thin mah ila, ei leh in kan sawngbawl dan leh chhawpchhuah dan a thianghlim miau si loh chuan, thildanga faina leh lan mawina kha a hlu chuang lo; mihring ber kan hrisel loha kan damloh miau chuan.
Kawnglak hotel-a ei leh in sawngbawl dan leh chhawpchhuah dan Rating te hi siam ni ve ta se, hriselna atana a pawimawh piah lamah tourism promote-na zel a ni. Khualzinmiten kan ram an rawn tlawh chhan ber hi kan ram mawina (natural beauty) rawn chen (enjoy) a ni a, chutih laia ei leh in sawngbawl dan tawp tak kan lo chhawpchhuahsak thin a nih chuan, an zawngchhang loh phah zel mai ang tih pawh hlauhawm tak a ni.