Kawngpui la dang reng

Kawngpui chhia leh lei thawmtha tura truck leh tipper neituten sawrkar an phut avanga Mamita road block an neih chu la chhunzawm zel a ni a. All Commercial Vehicles Mamit leh Sub Hqrs YMA Mamit he hmalakna hi an thlawp thu leh tihhlawhtlin a nih hma chu kal zel tha an tih thu an sawi.
Thudawn danin, district bawrhsap nen chuan an inbe tawh a, an thil phut tih hlawhtlinna tur lam department hotute nen sawi ho ala awm lo thung niin thu dawn a ni a. Hei vang hian road block hi chhunzawm zel a ni.
All Commercial Vehicles Mamit leh Sub Hqrs YMA Mamit chuan thuchhuah intawm siamin, road block neih hi an thlawp a. Tun thlenga truck leh tipper neitute thilphut tihlawhtling tura a concern department-in an harsatna a hmuna an la enpui lo chu mak an tih thu sawiin, Mamit district mipui hmuhsitnaah an ngai tih an sawi.
‘Heng thilphut hi tihhlawhtlin a nih hma chuan road block hi kal tlangpui zel tha kan ti a. Road block avanga harsatna tawk mipui hriatthiamna kan ngen a, kan district leh ram hmasawnna tur a ni tih hria in, mipui thlawpna kan ngen a ni,’ a ti.