Kawngpui leh mawhphurhna

Kawngpui chhia hian nghawng dang a ngah a, kawngpui a chhiat avanga harsatna thlen dan pawh kan hrechiang tlang a; hrechiang em em chunga kawngpui tha kan neih phah tlat lo thin hi a manganthlak lai tak chu a ni. Hei hi eng nge a chhan kan tih chuan, mawhphurhna kan inpek thuk tawk loh vang, tiin a sawi theih awm e.
Kuminah hian Sairang leh Kawnpui inkar kawng chhia avangin harsatna a thleng nasa ta hle a. Harsatna a thlen nasat avang hian a kaihhnawih minister hrang hrangte pawhin an tlawh phah a, tunhnaiah chief minister pawhin a tlawh bawk a. Helai kawngpui chhe zual lai hi kawngpui siamtu NHIDCL hnenah chief minister hian October ni 9 ral hma ngeia hnawh mam hman turin a hrilh nghe nghe a ni.
Eng party kaihhruai sawrkar pawh ni se, kawngpui a chhiat hian ‘ruahsur’ an mawhpuh tlangpui a, a changin a siamtu contractor/company an mawhpuh a, a changin ‘lung a chang tawk lo’ te pawh an ti thin. Mahse kawngpui a chhiat theih chhan chu a siamtuten a nihna tur anga an siam loh vang a ni mai. Kawngpui siamtuten a nihna tur anga kawngpui an siam leh siam loh lo endiktu tur a ram leilung neitu state sawrkar hian a ‘mawhphurhna’ hi tha takin lo hlenchhuak zat zat thin se, tuin nge kawngpui chhia min hlui reng ngam ang le?
Tun dinhmuna kawngpui thawm that hi chuan rei a daih dawn lo tih tlanghriat a ni. Ruahtui a hul hunah, kawngpui siamtuten eng angin nge hna an thawh tih hi uluk taka sawrkar hian a vilzui loh chuan, a ngaite bawkin, kawngchhia en tura minister rualho inzui duah duah reng hi mipuiin kawngpui chanchin thar kan hriat tur a ni leh mai dawn tihna a ni.
Tichuan, khua a han hul ang a, khaw tha hnuaiah kawngpui siamtuten hna an thawk ang a. Kawngpui chhia en tura inzui duah duah thin minister-te hian, kawngpui siam a nih hunah a nihna tur angin contractor/company ten kawngpui an siam em tih endik tur pawhin inzui duah duah tho se, kawngpui tha leh tlo chu kan nei maiin a rinawm.