Kawngpui Siam Runpui
Tpa Bunghai
War and terrorism had become child’s play – Malala.
Kum 10 kal ta, Otober ni 8-a tih chhuah I Am Malala lehkhabu hmang khan khawvel hriatah hel chetna rapthlak tak a rawn pholang a nih kha! Indo leh hel hmanga chetna te bak kha Malala-i nau Atal-a te thian ho ni tin nunah khan hriat tur dang awm hek lo le, silai lem leh grenade lem hmanga an infiam thin thu Malala-i khan a sawi tak kha – bomb ri dur dur leh silai puak tek tek erawh ngaiah neih a har ngang a ni ang, anni naupang khan an inkhualtelem thin dan kha a tak tak a rawn thlen erawh chuan in lamah kawh fuaa tlan hawin, an nu te kuahin an kimki chawih chawih thin!
He lam inkhualtelemna kawngpui… Thenzawl leh Buangpui inkar kawng chhiatzia saw helicopter atangin zuk hmuh fiah tham a ni lovang, Peshwar atang phei chuan an hre lovang!
Diltlang South leh Chawngte lui inkarah sawn zawh loh theih loh kawngpui, tui luan kawr thuk tak ang mai, chheng chhe zet leh lung zum a ther fer fur a – zawlnei i ni emaw, kawng tha lai zawn nei i ni emaw, sakhaw nei ve ik i nih chuan rilru tawngtaina nei lo va zawh chu har i ti viau ang. Chawngte lui leh Mualbu L inkara Taliban ho bomb darh tak emaw tih tur khawpa kawng te saw – darkar 1 ah KM 1 te chu kan zawh chhuak thei var var e.
Mualbu (L) atanga Chawngte lut thla tura Dangpuithu rim reh veka insawh thlak bur bur ngai te, Chakma bitna Chawngte C khaw chhung kawngpui han chhiat dan em em te saw, Cowboy hun laia Lawless Town an tih, dan awm lohna leh viltu nei lo ang mai a ni! Duichuani hmanga ngaihtuahna ti nu phut tan chuan a zia deuh mahna…
Chawngte L atanga Thorang bial leh Lunglei South bial tlan pelh paha thihna ruam emaw tih tur kawngpui zawh te saw – kan derthawng hliah hliah.
Malala-i nau, kha muslim naupang Atal-a ang mai khan an chhehvela thil thleng an hmuh thin hmangin Mizo kristian naupang, chhim lama kawngpui tha lo chhehvela khawsa te sawn inkhualtelem nan lirthei kawngpui sira tâng te saw engtin tak sawngbawl thin ang maw?
Chhim lam kawngpui sawn chet vel a tih muan em em avangin hmasawnna a Formula 1 thei lo chiang bal!
November ni 7-ah chhim lam unaute khan kawngpui siam runpui hnatlang lo nei mawlh teh u khai…