Kawngpui siam zawh ran phutin bungraw phur truck tlan dawn lo

Vairengte to Sairang inkar kawngpui, national highway chhe lai siam zawh thuai phutin bungraw phur truck ho chu vawiin – January 23 atang hian an tlan dawn loa, state pawn lam truck ho pawh an rawn lut rih lo ang. Mizoram Truck Owners’ Association (MTOA) leh Mizoram Truck Drivers’ Association (MTDA) chuan Mizoram chak lakna, Vairengte – Sairang kawngpui chhe lutuk chuan an truck a tichhe nasa a, a khalhtute nunna atan pawh a hlauhawm hial a ni tiin, 2025 January 23 atangin an tlan ngam dawn lo tih an lo puang tawh a. Truck tlan ngama kawng hi siam a nih hma chuan Mizoramah bungraw phur truck engmah a tlan dawn lo tih sawiin, eibar leh nitin mamawhah mipuiin harsatna kan tawk a nih pawhin hriatthiamna an dil lawk tawh a ni.
He thuchhuah an siam ni, January 20 atang hian Mizoram PWD enpuina in NHIDCL hnuaia contractor-te chuan kawng siam hna hi an thawk nghal a. Siam mek mah se, an thil tum hi an titlang phawt dawn tih thu dawn a ni.
The Aizawl Post-in MTOA hruaitute a zawhnaah, tlan loh hi an la tum tlang a. Sawrkar lam atangin an thil tum thulh tura ngenna pawh an dawng chiah loa, PWD minister nen erawh an inbe reng a ni. January 23 zing dar 7.00 atangin ‘tlan loh’ hi an tan anga, Rangvamual, Kawnpui leh Kolasib Rengtekawnah duty an indah ang.
“Kawng siam hna hi chu an tan mawlh mawlh tawh a, kan thil tum hi lungawilohna lantir ngawr ngawr lam niloin, eibar lakluhna ber, kan lifeline a chhe rei ta lutuk leh, truck leh a khalhtute dinhmun derthawnga kan awm reng hi a ni em em ta lo e, kan ti a ni ber a. Mipui mamawh phurtu kan ni a, mipui tan harsatna siam rei chu kan tum lo,” thulakna chuan a ti. State PWD leh NHIDCL-in kawngpui inhlan chungchanga harsatna an la neih pawh an hriatpui tih a sawi bawk.
Vairengte leh Sairang inkarah rau rau pawh Kawnpui leh Khamrang chu khuar leh chhia tam zualna a ni a, helai hi tunah khawih mek a ni tih sawiin, Ningani hian kawng en turin kal an tum a, PWD minister pawhin a en dawn nghe nghe tih a sawi.
Assam lama an eizawnpuite pawh information an pe a, an ni hi chuan kawng thatna tur a nih chuan an thlawp tha em em zel tih an sawi a ni.
Lirthei lian dang, tipper, tank lorry leh gas phurte pawh information hi an pe a. Tipper hi chuan thlawp an tum a, oil phur leh gas phurte erawh tlan an tum niin an hria a, an member an nih loh avangin na takin an ngen hran lo tih an sawi.
Helai kawng chhia hi PWD lam chuan thla khat chhunga siam zawh theih an inbeisei tawh a, thil hmanhmawh thlak mah ni se, hna phuailuai taka thawk lo tur leh tlo turin, side drain nen lam tha taka siam turin contractor-te an hrilh nia an hriat thu an sawi bawk.