Kawngpui siamna sum chan tam vangin lawmthu sawi

Parliament Session kal mekah Rajya Sabha MP K Vanlalvena chuan Thawhlehni tlaia Union Budget sawihonaah Mizoram chu hmarchhak state 8 zingah Assam tih lohah chuan Minitrsy of Road Transport & Highways hnuaia motor kawngpui siamna atana budget chang tam ber a ni chu lawmawm a tih thu a sawi.
Mizoram MP-in House a hrilh danin, Ministry of RTH-in North East state hrang hrangte tana national highway siamna atanasawrkar laipui sum ruahman dan chu – Arunachal Pradesh cheng vaibelchhe 5327, Assam vbch. 34198, Manipur vbch. 13779, Meghalaya vbch. 7219, Mizoram vbch. 16606, Nagaland vbch. 10643, Sikkim vbch. 4494, Tripura vbch. 5106. A vaiin hmarchhak tan cheng vaibelchhe 97372 a ni.
Mizoram chu tlangram a nih avangin inkalpawhnan rel kawng emaw lawng kawng emaw aiin motor kawngpui tha chu a mamawh ber tih a sawi a. Hemi atana sawrkar laipui MRT&H-in Mizoram hmun hrang hranga two lane road an siam mek, Aizawl by-pass road siamna tur, Silchar to Aizawl four lane road siamna tur, Zorinpui to Lawngmasu National Higway atana puan thar, Saitual to Tuivai kawng, Lunglei to Tlabung kawng atana budget-a cheng vaibelchhe 16606 dah a ni chu lawmawm a tih thu a sawi.
Tunhmaa darkar 14 chhung tlan thinna, Aizawl to Tuipang chu tunah darkar 8-ah a thlen theih tawh tih K Vanlalvena hian a sawi a. Darkar 10 tlan thinna Aizawl to Champhai pawh darkar 5-a thlen theih tawh thute sawiin, hei hi state tan hmasawnna ropui tak a ni tih a sawi a ni.