Kawngpui tha neihna tura PWD leh YMA thawhdunna an thlirlet

Kawngpui tha neihna tura PWD
leh YMA thawhdunna an thlirlet
State PWD leh Central YMA-in Mizorama kawngpui tha kan neih theihna tura thawhdunna thuthlung an ziah chungchang chu Ningani khan thlirleta sawiho hman a ni.
PWD engineer in chief H Zoramliana’n state chhung inkalpawhna kawngpui tha kan neih theihna tura PWD leh YMA thawhdunna a tha tih sawiin, PWD-in kawngpui enkawl a ngah a, sum indaihlohna avangin duhthusama enkawl theih a ni loa, YMA tawiawmna leh thawhpuina an mamawh tih a sawi. Thawhdunna thuthlung ziah avangin hmun tam takah hmasawnna leh kawngpui siam kawnga awlsamna an hmu tih a sawi a ni.
Central YMA president Lalhmachhuana pawhin, YMA-in kawngpui siamte pawngpaw sawisel mai loa, MoU ziah a nih avanga tawiawm tur leh thawhpui tur an nih dan, sawisel tul a nih chuan huai taka sawisel a, enpui zel turin YMA hruaitu kalkhawmte a chah. PWD nen an thawhdunaah theihtawp chhuaha kawngpui tha kan neih theihnan hma la turin a chah bawk.
Sub- Hqrs YMA, Group YMA leh City Branch aiawh an kalkhawm a, zawhna awmte chhan a ni. Zoram hmun hrang hranga kawngpui siama harsatna leh kawngpui chhia chungchang sawiho leh inhrilhfiah a ni bawk.
YMA leh PWD hian kum 2018 atang khan thawhdunna thuthlung an lo ziak tawh a, kum 2022 ah ziah thar lehin, kumin August 8 khan kum thum chhung atan MoU hi ziah thar a ni.