Kawngpui tihnawk leh tichhe thei awm leh awm loh endik

Serchhip District Road Protection Squad Team B chuan an leader, SDC Dr C Vanlalchhanhimi hoin Serchhip khaw chhung – Vengchung, Field Veng leh Dinthar VC area-a kawngpui an endik a, kawngpui tichep leh tichhe thei zawnga thil dah leh hnathawh a awm leh awm loh an enfiah.
Lirthei leh mipui veivahna atana hnawk thei thil dahtute chu insenghawi turin an hriattir a. Road Protection Squad hian an hmalakna hi khauh taka kalpui tumin, an endikna chungchangah a tul anga sawiho a ni anga, thla khat hnuah endik leh tur niin, bungraw dah sawn tura an tih ten thu an zawm em tih an en anga, dan zawm lote chungah a tul anga hma lak zui tum a ni.
Serchhip Road Protection Squad hian Serchhip khawpui chhunga kawngpui a him tawk em tih leh, vantlang tana hnawk thama kawngpui nek an awm em, tih an endik thin a. Kawngkama dawr leh workshop neiten kawng an nek em tih te, garage nei loa kawngsira lirthei riah thin an awm em tih te an endik.
Team 4-ah inthenin official-te bakah tlawmngai pawl hruaitute leh Joint VC hruaitute an tel a. Serchhip khawpui chhung VC area hrang hrangah insemdarhin a tahtawlin kawngpui hi an endik thin a ni.