Kawngzawh leh a behbawm…
Manipur-a Zo hnahthlak unaute thlavang hauhna kawngzawh chu nimin khan tluang takin Mizoramah neih a ni a. Kawngzawhnaah hian Manipur buaina tuartu Zohnahthlak unaute tanpuina tur thawhlawm khawn pah a ni a. Aizawlah cheng nuai 10 chuang hret a tlingkhawm a, district dangah tuna hriat theih chinah khaw panga atanga thawhlawm tlingkhawm hi cheng nuai riat vel a ni bawk.
‘Ramin ri a nei a, hnam erawh chuan ri a nei lo’ tih ang khan, state pakhat rorelna hnuaia kunho ni lo mah ila, Manipura Zohnahthlak unaute hi, kan unaute an nih miau avangin an tawrhna chu kan tawrhna a ni, kan ti a; min daidangtu a awm thei lo; chu chu nimina kawngzawha mipui chet vel dan atang khan a lang chiang. Tha leh zung, hun hlu tak bakah sum leh pai nen, awrawl tawp tawpa au chungin an thlavang kan hauh a. Kha kawngzawh kha kan unaute tana a tawp thlenga theihtawp kan chhuah turzia lantirna a ni.
Manipur-a buaina a lo chhuah atanga tun hun, thla thum deuh thaw a ral tawh hnu hian thihna, insawisakna, rapthlak taka hmeichhe pawngsual, lu tana indiriamna, chenna in inhalsak, Pathian biakbuk inhalchhiatsakna nasa tak a thleng chur chur a, Manipur a kang a, meikhu pawh van sang lamah a ding chho ngut ngut a. State thenawmah raltlan an lut nguah nguah a. Heng zawng zawng hi chanchintharah te, social media lamah te, hai der theih rual lohvin a darh chuaih chuaih reng bawk.
Chuti chung chuan India a ngawi tlat a, India a ngawi kan tih chuan a mawhphurtu chu Prime Minister a ni. India hi a ngawi chiang hle a, a chhan chu, khuarel chhiatna heng tuilian, lirnghing, leimin etc a lo thlen changin, ram hruaituten a tuartute an tlawh vat a, chhawmdawlna tur an ngaihtuahsak vat thin. Chutih laiin, State pakhat a kang hluah hluah a, raltlan an darh chum chum a, state pakhat (Mizoram) hruaitu berin remna leh muanna a awm theihna turin sawrkar laipui hruaitute a be lawm lawm a, raltlan awm dan leh chhawmdawlna mamawh a nih dante pawh a thlen bawk a, chu chu tun thlengin bengkhawn leh ngaihtuah a la ni lo.
India inpumkhatna duhtu inti tan hetiang hi engtia thlentir thei nge a nih tih hi Prime Minister hnena Zofate zawhna a ni lo thei lo.