Kawnpui leh Sairang inkarah MLA 16

Kawnpui leh Sairang inkar NH-6 kawngpui chhia leh a behbawm harsatna sutkian dan tur ngaihtuahin ZPM Legislature Party chuan tunhnai khan thutkhawm hmanhmawh an nei a, thutkhawmnaa telte hi an vaiin Minister leh MLA 16 an ni. 
Kawng a chhiat avangin MLA 16 an kalkhawm a, hei hi ruling MLA hmun thuma thena hmun hnih thuak; Mizoram MLA zawng zawng zatve thuak an ni bawk.  Heti zat MLA rualin kawng chhiat avanga harsatna sutkian dan tur an ngaihtuah a ni a, harsatna hi sutkian thuai theih beisei ila.
Hetih rual hian, kawng chhia chungchanga Mualkhanga NHIDCL leh PWD hotute an inkawm khan, NHIDCL hotute chuan tun dinhmuna kawng tichhe nasa bertu pakhat chu ‘Railway kawng sialin lei an laih chhiat nasat vang’ tiin an sawi a. Kawng chhiat chhan dang kan hriat belh leh ta! Chemtatrawta thawnthu kan iang leh tan dawn ni maw?!
Kawng chhiat chhana a mawhphurtu (a Kaikuang) kan zawng dawn a nih chuan, sawrkar kal tawh zawng zawng kha kan kawk thei vek ang a, tuna sawrkarna chelh mek pawh a bang chuang lo. Tuna sawrkar thar hian, sawrkar hmasate aia tha zawk an nih tur thu an sawi kha an bawhzui chak loh avangin, sawrkar hmasate hun laia kawngpui chhiain harsatna a thlen thin ang tho kha tunah pawh hian a thleng mek a ni a. Aizawl khawpui chhung kawngpui siam thar thenkhat phei hi chu zahthlak khawpin a chhia a, thla hnih khat lekah lirtheiin a chil phut dep dup tawh mai a nih hi. Chuvangin, kawngpuiah na na na hi chuan tu mah inpuhmawh thei bik an awm lo.
Tunhma khan, state pawn lam kawngpui chhia avangin Mizoramah bungraw phur lirthei an lo lut thei lo thin kha a ni a, tunah chuan state pawn atanga bungraw phur lirthei lo lutte Mizoram chhungah ngei an tang thep thup ta mai a, hei hi a mualphothlakin a zahthlak piah lamah a thinrimthlak tel bawk. Kawngpui siam mektu NHIDCL lam an demawm rualin, hetiang dinhmuna kan awm thei hi a ram leilung neitu state sawrkar pawh a demawm tel lo thei lo. 
Kawngpui chhiain mipui harsatna namen lo a thlen tawh hnuah MLA rual 16 an thukhawm a, hmalakna hrang hrang an puangzar a, a lawmawm tho e; mahse, se bo hnua se kawng khar hi chu ‘hloh’ hnua thiltih a nih tawh avangin a lawmawm dan a famkim thei tawh chiah lo thin a ni.