Kejriwal tunkar Tihar Jail ah la awm dawn

Delhi Chief Minister Arvind Kejriwal chuan tunkar chhung Tihar Jail ah hun a hman a ngai dawn a, a chhan chu Supreme Court a Delhi High Court thutlukna siam khinna chu niminah ngaihtuah a nih hman loh vang a ni a. Supreme Court chu Thawhtanniah hawn leh chauh tur a nih vangin tunkar chu Tihar Jail ah a la awm a ngai dawn a ni.
Supreme Court chuan Kejriwal ngenna chu ngaihtuah turin special bench din a tum nia sawi a ni a. Ningani chu Eid-Ul-Fitr a nih avangin khar a ni a, Zirtawpni chu local holiday a ni bawk a, kar tawpin zuiin Thawhtanniah chauh hawn a ni dawn a ni.
Kejriwal counsel Senior Advcate Abhishek Singhvi chuan Chief Justice of India DY Chandrachud hnenah nimin zing lamah urgent hearing neih a ngen a. Chief Justice chuan ‘Kan en ang a, kan enfiah dawn a nia’ ti bakin a chhang lo a ni.
Thawhlehni khan High Court chuan March 21 a ED tena Kejriwal an manna khinna chu a hnawlsak a. Court chuan central agency te chuan AAP leader in money laundering case a an hmaa inlan tura an kohna tam tak a chhan duhloh avangin duhthlan tur an nei lo a tihsak a ni.
High Court chuan thuzawh fiah an neihnaah agency te chuan mi pangngai leh Chief Minister chu an thliar hran a rem lo a ti bawk.