Kendrick Lamar ‘Not Like Us’ a lar ber
Kendrick Lamar ‘Not Like Us’ a lar ber
Kendrick Lamar chuan Super Bowl LIX halftime show performance a la hlawkpui zel a, he show-a a hla perform ‘Not Like Us’ chu Billboard Global 200 chart-ah No.20 atangin No.1-ah a invawrh kai leh ta a, tunkar chart top 10-ah a hla panga a lang thawt.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian khawvel ram hrang hrang 200 chuanga kar khat chhung a official-only stream (subscription leh ad-supported audio leh video music services) leh download sales te chu tehna pawimawh a ni.
‘Not Like Us’ hian stream maktaduai 113.2 leh sales 39,000 nei lehin No.1 a kai thar leh a, he chart-ah hian a zawn ni lovin kar thum a No.1 tling ta. ‘Not Like Us’ hi nikum May thla laihawl chart-ah khan No.1-ah a debut a, kar riat chhung top 15-ah a lang zui a, July 2024 chart-ah No.1 kai lehin, kar 30 chhung a chawlh leh ren rawn hnuah tunah No.1 a rawn kai leh ta a, he chart-ah hian Krismas rimnam hla ni loah chuan No.1 nih inkar hlat ber record a la ni.
Lamar hla dang ‘Luter’ featuring SZA chu No.12 atangin No.4-ah a invawrh thar leh a, ‘TV Off’ featuring Lefty Gunplay chu No.27 atangin No.8 a kai thar leh a, 2018-a a hla tihchhuah tawh ‘All the Stars’ featuring SZA chu No.74 atangin No.10 a kai a, he chart-a Lamar hla top 10 kai thei 12-na a ni a, SZA tan a pariatna a ni ve thung. Heng hla pali te hi Super Bowl halftime show-ah khan a perform vek a ni.
He chart-a a zawn ni lova kar kua No.1 thei, Lady Gaga leh Bruno Mars ‘Die With a Smile’ chu No.1 atangin No.2-ah a tawlh a, kar 12 No.1 ni thei ROSE leh Bruno Mars ‘APT.’ chu No.2 atangin No.3-ah a tawlh ta bawk. Lady Gaga ‘Abacadabra’ chu No.10 atangin No.5-ah a insawn ve thung.
Billboard Global 200 Top 10:
1 Not Like Us – Kendrick Lamar
2 Die With A Smile – Lady Gaga & Bruno Mars
3 APT. – ROSE & Bruno Mars
4 Luther – Kendrick Lamar & SZA
5 Abracadabra – Lady Gaga
6 Birds Of A Feather – Billie Eilish
7 DTMF – Bad Bunny
8 TV Off – Kendrick Lamar Featuring Lefty Gunplay
9 Messy – Lola Young
10 All The Stars – Kendrick Lamar & SZA