Kenya-a sorkar duh loh lantirnaah mi 31 thi tawh

Kenya-a sorkar duh loh lantirnaah mi 31 thi tawh
Kenya-a sorkar duh lohna lantirnaa thi chu mi 31 vel an ni tawh niin an ram human rights commission chuan a sawi a, ram puma kawng zawhnaa thil thlengah hian mi 107 vel an inhliam bawk.
Thawhlehnia National Commission on Human Rights (KNCHR)-in report a tihchhuahah kum 1990-a Africa khawchhak lama mipui rorelna kalhmang lo taka rorelna duh lohna lantirna champhaa kawng zawhnaah hmun hnihah tharum thawha inhnawh darhna a thleng niin an tar lang.
Commission hian he thil thleng bikah hian mi 10 thiin mi 29 an inhliam a, mi 532 vel man an ni tih a sawi.
Kawng zawhah hian sorkar duh lotute leh police chu an khawpui, Nairobi bakah Eldoret khawpuiah an innawr niin KNCHR chuan a sawi a, police hi mi sual pawl, chem leh fei nena inthuam nen an tangrual niin an sawi.
Thil tam tak a chhia a, supermarket-te pawh a chhe tel.
KNCHR chuan ‘mihring dikna inpalzutsak hi kan dem a, a mawhphurtu zawng zawng – police, civil mi leh mi dangte pawh an chet dan tha kan ti lo’ tih an sawi.
Thawhtannia kawng zawh kha Saba Saba Day (Seven Seven) an tih, Kenyan-ten July 7, 1990-a President Daniel arap Moi-a’n kum tam tak ro a rel hnua party pakhat aia tam awm duha nawr nana kawng an zawh champha a ni.
Saba Saba Day pual bakah hian June, 2024 atang tawh khan thalaite chuan Kenya-ah hian sorkar laka lungawi lohna hrang hrang an lantir tawh a. Chhiah tihpun te, eibar harsa lutuk te, ei rukna leh police chet dan rawng tak takte chu an duh lohna an lantir thin.
Lungawi lote hian President William Ruto-a chu bâng turin an nawr bawk.
Sorkar duh lohna lantirtute hi police-in na takin an nawr let hlawm a ni.
Police Reforms Working Group chuan Thawhtannia duh lohna lantirna hi Kenya-a county 47 zinga 20-ah kalpui a ni tih an sawi.
Thawhlehnia chhunzawmnaah thi an awm leh nual avangin nikum atanga thi chu mi 100 chuang an ni tawh a. Heng zingah hian June 25-a ram puma police chetna leh sorkara ei rukna duh lohna lantirnaa thi mi 16 an tel.
President Ruto-a chuan Nilaini khan police chuan sumdawnna hmun suasamte chu an kap zel dawn tih a puang.
President-in commissioner atana a ruat, Kenya National Cohesion & Integration Commission chuan politician-te chu boruak tialh zual thei tawngkam hmang lo tur leh police pawh mipui laka na taka an chetnaah an dem thu an sawi.