Kenya-ah fanghmir tawlh tum mi pali hrem

Kenya-ah fanghmir tawlh tum mi pali hrem
Kenyan court chuan an ram atanga fanghmir chi khat, queen ant nung lai tawlh ruk tumtu mipa palite chu kum khat lung tang turin a hrem a, an tan loh chuan $7,700 an chawi a ngai dawn.
Belgian pahnih, Vietnamese leh Kenyan pakhat ve vete hi thla hmasa khan Europe leh Asia-a a lakhawmtute hnena hlan chhawn tur fanghmir nung lai nen man an ni.
Thil sual an tih loh thu an sawi a, Belgian pahnih hian court-ah fanghmir an zawn nasat thu leh an hobby a nih thu an sawi a, thil sual a ni tih an hre lo tih an sawi.
Insawi thiam mah se Nilaini khan judge chuan an fanghmir lakkhawmte hi a hlu lutuk a, sang chuang an ni nih bawk avangin a hrem ta tho.
“Fanghmir lakkhawm hi hobby a lo ni thei a; mahse, queen ant 5,000 chuang lakkhawm hi chu hobby piah lam a ni,” tiin Magistrate Njeri Thuku chuan a sawi.
“Khawvel hian hetiang chi hi tam tak a lo hloh tawh a, kan tihtawp thuai a ngai,” a ti a. “He court hian thil siam eng pawh, a lian leh te pawh a himna turin a ti zel ang,” a ti.
Fanghmir an mansak zingah hian a lian chi, African harvester ant-te pawh telin UK-a dealer thenkhat chuan pakhat pawh $220-in an lei ngam.
Belgian kum 19 mi ve ve, Lornoy David leh Seppe Lodewijckx leh Vietnamese Duh Hung Nguyen leh Kenyan Dennis Ng’ang’a te hi magistrate chuan hremna inang tlang a pe.
Belgian pahnihte hi fanghmir 5,000 nen man an ni a, mi dang pahnih hian an apartment-ah 300 chuang an lo kawl bawk.
Fanghmirte hi test tube-a cotton wool hnawh 2,000 chuangah thla tam tak an dam theih nan an lo dah tih thuneitute chuan an sawi.
Belgian rawltharte hi Kenya-ah hian tourist visa-a lutin ramsa park leh dil tamna, Naivasha khuaah an cham a ni.
Kum 23 mi, Nguyen-a hi court chuan ‘mule/courier’ tiin a sawi a, fanghmirte lain a turtuin a ticket man a tumsak thin.
Court chuan kum 26 mi, Ng’ang’a hi ‘broker’ tiin fanghmir chanchin a hriatna hmang tangkaiin thingtlang inah a manna tur a kawhhmuh tih a sawi.
Court chuan ram dang mi pathum chu an sum chawi tur emaw, an tan hun an tlakah an ramah an haw thei tih a sawi a, hremna chu ni 14 chhungin court sangah an thlen thei bawk.
Kenya-ah hian fanghmirte hi ram dangte nen inremna neia ven him an ni a, sumdawnna atana hman khap tlat a ni.