Khankawn to Champhai kawng Laih zauh dan tur a hmunah en

Khankawn to Champhai kawng
Laih zauh dan tur a hmunah en
Champhai North bialtu MLA, adviser to CM (Technical) Er H Ginzalala hoin Khankawn Police Check Gate, Chalbawiha Junction atanga Champhai khawpui luhka ber kawngpui laihzauhna tur Mizoram sawrkarin cheng vaibelchhe 6.5 a ruahman tak thawh dan tur chu Ningani khan an enho.
He kawngpui hi hun rei tak atang tawha ruahmanna siam niin, Ministry of Road Transport & Highway (MoRTH) hnenah DPR siama hma lak tawh thin ni mah se, beisei angin ruahmanna a puitling thei loa, Champhai North bialtu MLA hian ruahmanna lian zawk nen bawhzuiin, state sawrkar pawhin a tulna hria in chief minister Pu Lalduhoma leh sawrkar hotuten laihzauhna tur sum an ruahman ta tih ZPM Champha North Block chuan thuchhuah a siam.
Ruahmanna tha zawk a awm theihnan, department hotute mai ni loin, tlawmngah pawl hrang hrang aiawh nen enho niin, kawngpui tha neih theihna tur a nih dawn chuan ram neitute pawhin khawpui leh an tu leh fate hmakhaw thlir chunga thilphalna rilru nen ngaihtuahna sen a ngai dawn tih thuchhuah hian sawiin, survey leh hmachhawp pawh Champhai bawrhsap kaihhruaiin thuneitute leh tlawmngai pawl aiawhten ram neitute lo titipui hmasa se, an report-te sawrkar thuneitute nen thlirho lehin, kumthar tir atanga hna thawh tan theih beisei a ni tih a sawi bawk.
PWD hotute chuan, an sum neih ang anga laih zauh hna thawh phawt a, double lane standard tala tih theih duh mah se, an phak loh pawhin intermediate lane – metre 5.5 tala tih theih ngei an tum dawn tih an sawi a ni.