Khapna dan bawhzui….

Khawvel huap ‘Plastic Bag Free Day’ rualin hmankhat daih plastic hmang tawh lo tura inzirtirna beihpui ‘Ban on Single Use Plastic Drive’ niminah hman a ni a. A thua inzirtirna lam hi chu kan kalpui nasa, mahse a taka zawm lam hi chu kan kalpui nasa lem lo thin.
October ni 2, 2019 atang khan Aizawl pawh ‘Plastic Free City’-ah puan a ni a, kum thum chuang a han vei leh meuh chuan, ‘thenfai hnatlang’ thawh mup mup karah pawh manganthlak khawpin plastic bawlhhlawh a kiam thei meuh lo chu a ni.
Hmankhat daih plastic item hrang hrang khap takte hi plastic bag hman khap aiin kan zawm tha deuh niin a lang a. Plastic bag erawh hi chu, khapna dan kenkawh a nih hlim, a tir lam tih loh chu a hnu lamah urhsun taka dan kenkawhna a awm zui lem loh vang te pawh a ni ang a, tun dinhmunah chuan khap a ni tih pawh hriat loh khawpin kan leklam nasa leh tawh a ni ber.
Plastic bag hi tunhmaa 50 microns aia pan hman khap ni thin kha, 2021 September atangin 75 microns-ah a kai chho a. December ni 31, 2022 atangin 120 microns aia pan hman khap a ni leh ta a. Microns 50 aia pan hman khap a nih tirh khan AMC lam khan hun engemaw chen chu khapna dan tha takin a kengkawh a. Sumdawng/dawrkaite pawh insiamremna hun thawl tha tak pek an ni a, khati chung khan dan kenkawh a han ni a, man tur tawk chu an la awm teuh tho a nih kha.
Tun hnuah hian, khatianga khapna dan kenkawh ang kha a awm mumal tak loh avangin bazar puiah chuan eng plastic bag pawh zalen taka leklam a ni leh tan ta. Dawr lian deuh chin hian dan an zawm tha phian a, paper bag an hmang nasa ta.
Khapna dan hi kenkawh chi a ni a, dan kenkawh thatna ram apiang ram changkang kan tih mai hi. Chutih laiin, mipui pawhin khua leh tui tha ni turin sawrkar dan zawm hi kan duty a ni tih hriain zawm bawk ila, kan changkang a ni ve mai.