Kharge-an Murmu hnenah thlen

Congress chief Mallikarjun Kharge chuan February 26 khan President Droupadi Murmu hnenah lehkhathawnin Agnipath scheme avanga armed forces a thalai sipai tan tum tena harsatna an tawh chu ‘dikhlel taka rorelna’ a ni tiin a sawi.
Centre thutlukna avangin thalai mipa leh hmeichhia 2 lakh chuang te hmalam hun chu a chiang lo hle a ni tiin Kharge chuan President hnena a lehkhathawnah a ziak a. President hi Supreme Commander of Indian Armed Forces a ni.
Kharge chuan a lehkhathawn chu X ah post bawkin chutah chuan Congress chuan armed forces a tan tum thalai tena an dikna chanvo an neih theih nana an beihna chu an thlawp tlat thu sawiin thalai te chu ‘ram hmangaihtu leh huaisen’ tiin a sawi bawk. Kharge lehkhathawn hi Rahul Gandhi pawhin X ah a share a ni.
Murmu hnena a lehkhathawnah Kharge chuan, “In hnena ka lehkhathawnna chhan ber chu India sorkar mekin a tiam kalhin thalai nuai tel te lakah dik lo takin thil kalpui mek a ni” a ti a. Heng thalaite hian an tum nih tumin kum akum an beih thu sawiin tunah chuan beidawnga awmin tam takin mahni an intihhlumphah a ni a ti bawk a.
“Hetianga dik lo tak hmang hian kan thalai ten an tawrh kan remti tur a ni lo. Justice a awm ngei theih nan hmala turin ka ngen che a ni” tiin a sawi.
Kharge chuan tun hnaiah thalai mipa leh hmeichhia Indian Armed Forces zawm tura thlan tawh mahse ram tana an thawh theihna tur hnawlsak leh si te a hmuh thu a sawi bawk a.
“Tun hnaiah ka hmu hlawm a, kum 2019 leh 2022 inkar khan thalai mipa leh hmeichhia 2 lakh chuang te chu armed forces pathum: Indian Army, Indian Navy leh Indian Air Force a thakw tura thlan an nih thu hriattirna pek an awm tawh a. Heng thalai te hian mental leh physical test bakah written exam te paltlang veka rim takin an bei a ni”
“31 May 2022 khan an dream tihlawhtlingin joining letter chauh nghak tawh an ni a. Mahse, an dream te chu India sorkar thutlukna siamin tichhe vekin an recruitment process chu hnawlin Agnipath scheme a kalpui ta zawk a ni” tiin Kharge chuan a sawi a.
Army chief general hlui MM Naravane pawhin a lehkhabu ziahah Agniapth chuan Army te chu ‘a barakhaih’ tia sawiin Navy leh Air Force te tan pawh inbarakhaihna a ni’ a ti, tiin Congress leader chuan a ziak bawk.
Kharge chuan Agnipath scheme thatlohna ber chu ‘thleibik nei a ni’ tia sawi bawkin sipai ah parallel cadre siamin hnathawh in ang tho si mahse hlawh, hlawkna leh thil dang intluktlang lo a siam a ni a ti bawk a.
“Agniveers tam ber te chu kum li an service hnuah ban an ni ang a, hna dang an zawn leh a ngai ang a, chu chuan social stability a nghawng dawn” tiin a sawi bawk a.
India thalai 2 lakh chuang te hmalakm hun chu India sorkar thutlukna siamin chiang lo takin a siam a ni, tiin Kharge lehkhathawn chuan a sawi bawk.
June 2022 khan India sorkar chuan service pathuma age profile tihzim nan armed forces ah Agnipath recruitment scheme a kalpui a ni. He scheme hnuaiah hian thalai kum 17 leh a chanve atanga kum 21 inkar lak an ni ang a, kum li an thawh hnuah an zinga 25 per cent te chauh chu kum 15 sipaia tang zui turin thlanchhuah an ni leh dawn a ni.