Khaw 174-in Zo Thei Huan nei

Mahni khaw ram chhunga ram humhalh, Zo Thei Huan nei khua/veng 174 an awm tawh.
Mizoram Environment & Forest Consultative Forum (MEFCOF) hruaitute chuan Nilaini khan chief minister Lalduhoma chu a office-ah an kawm a. Mahni sum leh pai senga ramngaw humhalh leh tuihna tihpunna lam buaipuitu MEFCOF chu pawl zahawm tak nia a hriat thu a sawi. An ruahmanna a hlawhtlin theihnan sawrkarin thawhpui zel a tum dawn tih hrilhin, ruahmanna hi ziaka thlen turin a chah.
MEFCOF hian bul tan nan kum 2004 khan Neihdawnah Zo Thei Huan an siam a, a hnuah Chawngtlaiah an din leh a, khaw hrang hrangah kalin ramngaw humhalh tulna an zirtir zel a ni. Zo Thei Huan Committee din zelin chu’ng pawl chuan an khaw Zo Thei Huan an enkawl a, tunah hian khaw 174-ah Zo Thei Huan an din tawh.
An thupui ber chu “khawih loh” tih a ni a. Khawtinah humhalh theih ngaw awmte tha taka humhalh a, nungchate pawh zalen taka awmtir chu an tum ber a ni. Tuihna kam zel a lo pun thar theih nana Rain Garden Policy an duan chu chief minister hmaah sawifiahin, Tlawng lui tuihna tipung tura pilot project kalpui an duh thu an thlen a ni.
MEFCOF hruaitu VL Bela hian kum 1975 atang khan Tlawng hi a hun leh hmun ngaiah kumtin tui san zawng a la teh ziah a ni.