Khaw 8 Lakhuihthei 97%
Sialhawk Pineapple Growers Society tarlan danin Sialhawk khuain nikum fur chhung khan lakhuihthei quintal 14,000 an tharchhuak a, chu chu Mizorama lakhuihthei tharchhuah atanga 64% a ni. Sialhawk thenawm khua 7 -Tlangpui, Tlangmawi, Chalrang, New Chalrang, Lungtan, Khawhai, Vangtlang te nena an tharchhuah belhkhawm chu Mizoram lakhuihthei tharchhuah atanga 97% a tling phak niin tarlan a ni bawk.
He data atang hian nikum fur laia lakhuihthei tharchhuah chu quintal 21,875 a ni tih a chhutchhuah theih ta a. Sialhawk leh a chhehvel khaw 7 tharchhuah belhkhawm hi quintals 21,218 (97%) a ni a; Sialhawk tel lova khaw 7 te tharchhuah hi qntls 7,219 (33%) a ni bawk a; Mizoram hmun danga tharchhuah chu quintals 657 (3%) tihna a ni.
Khawzawl district chhung Sialhawk leh a chhehvel khuaah te hian tha takin lakhuihthei a tharchhuah theih avangin sawrkar pawhin kuthnathawktute hmakhua ngaiin lakhuihtheih dehral leh sawngbawl dan turah hma a la chat a, Pineapple Processing Plant din a ni dawn a. Hetiang deuh bawk hian Tualte leh a chhehvelah pawh tha taka Tomato tharchhuah theih a nih avangin Tomato Processing Plant din mek a ni bawk a.
Kuthnathawktu tam zawk hi chuan eizawnna buatsaih turin bultanna an neih mumal thin loh avangin hlawk thamin an thawk chhuak thei lova; thawk ve reng chung siin hma an sawn thei thin lo. Tuna lakhuihthei leh tomato chingtute pawh hi sawrkar (horticulture) lamin an chhawmdawl (facilitate) hma kha chuan lakhuihthei hi an larpui thei chuang lo; chu chu hun kaltawh khan a hril chiang vek.
Chumi awmzia chu, kuthnathawktute chhawmdawl hi sawrkar tan thil harsa a ni lo va, bultannaah sawrkarin a chhawmdawl that phawt chuan a hnu lamah chuan tanpui reng pawh an ngai tawh bik lova, bultan sak thiam hi a pawimawh tih a lo lang. Hetiang bawk hian Mizorama tharchhuah theih dang heng hmarcha, sapthei, serthlum etc pawh hi sawrkarin kuthnathawktute mawng dawm chunga bul a tansak theih phawt chuan, rei lo teah hmasawnna lian tak a hmuh theih ang. Sawrkar hian a tum tak tak chuan thil harsa a awm lo.