Khaw chhiat vangin rangkachak khura tang chhanchhuak thei lo

Khaw chhiat vangin rangkachak
khura tang chhanchhuak thei lo
Lei min nasa takin Indonesia khawchhak lam kilkhawr taka rangkachak laih chhuahna khura tang mi 14-te chhanchhuah hna chu ruah sur nasa lutuk avangin an thawk hlei thei lo va, he hmunah hian mi paruk an lo thi tawh.
Thawhtanni khan thuneitute chuan khaw awm dan dik lo leh a hmunhma rem bawk si lo chuan Indonesia-a region chhak ber, Papua-a chhanchhuah hna hi a tikhaihlak tih an sawi.
Zirtawpni zan tlai tawh takah khan ruah tam tak sur avangin West Papua province-ah mi chengten Arfak Mountains-a rangkachak laih chhuahna khur an siamah lei a min niin National Agency for Disaster Management thupuangtu, Abdul Muhari chuan Reuters news agency a hrilh.
Thil lai chhuaktute awm nana an hmante chu tuiin a la a, mi paruk thi awmin mi dang paliin hliam an tuar bawk.
“A chhak lam atanga tui lianin chen nana an hmante chu zan dar 09:00 (India-a tlai dar -5:30) velah a la,” tiin Muhari-a chuan a sawi.
Chin hriat lohva awmte zawn zui hna hi ‘kawng chhia leh tlangram rem lo lutuk bakah khaw awm dan avangin a khaihlak’ tiin chhanchhuah hna thawktu police leh sipai hotu, Yefri Sabaruddin chuan a sawi.
Chhiatna thlenna hi a hnai ber khua atang pawhin darkar 12 kal a nih thu a sawi bawk.
Thuneitute chuan Thawhlehni atanga zawn chhunzawm leh turin an ti a ni.
Asia chhimchhak rama thliarkar awm khawmah hian phalna nei lova thil laih chhuahna siam hi a tam hle a, heng hmunte hi a bul hnaia chengten himna atana inthuamna tha nei si lovin rangkachak zawn nan an hmang nasa hle.
Chhiatna pawh a thleng fo tawh thin a, thuneitute tan pawh enpuia khuahkhirh turin a kilkhawr thin em avangin a harsa ve bawk.
Tuna chhiatna thlenna hi phalna nei a ni em tih sawi a awm lo va. Sabaruddin-a chuan tunah rih chuan chin hriat lohte zawn hmuh chu an tum ber a ni rih tih a sawi.
Indonesia hi fur hun lai, November leh April inkarah lei a min nasa hle thin a. September thlaah khan West Sumatra-a dan lova rangkachak khur siamah lei minin mi 13 an thi a, mi 12-in hliam an tuar bawk.
July thla khan Sulawesi thliarkara dan lo thova rangkachak laih chhuahna khura lei minah mi 27 vel an lo thi tawh bawk.