Khaw vawt vangin state tam takin sikul chawlh pawt sei
Khaw vawt vangin state tam takin sikul chawlh pawt sei
State tam taka thuneitute chuan thlasik khaw vawt vin tak avangin sikulte thlasik chawlh hun chhung tur chu an pawt sei hlawm.
Punjab sorkar chuan chawlh hi Thawhlehni thleng atan a pawt sei a. Education Minister Harjot Singh Bains-a chuan naupangte leh zirtirtute hriselna dinhmun leh himna ngaihtuah chunga pawt sei an nih thu a sawi.
Chawlh hi sorkar, mi mal, aided and recognised sikul zawng zawngin zawm turin a ti.
State sorkarin ruahmanna a siamah chuan sikulte thlasik chawlh hi December 24 leh 31 inkar turin a ti a. A hnuah January 7 thleng pawt sei tawhin tunah a pawt sei leh ta a ni.
Uttar Pradesh-a Gautam Buddh Nagar district thuneitute pawhin pawl riat leh a hnuai lam chin chu Ningani thleng chawl turin a ti thar a. Thupek hi an district chhunga CBSE, ICSE, IB, Uttar Pradesh Board leh board dang hnuaia awm zirna in zawng zawnga zawm tura tih a ni.
District Basic Education Officer Rahul Panwar-a’n hriattirna a tihchhuahah chuan district magistrate-in thlasik khaw vawt taka zirlaite himna tur ngaihtuaha chawl tura a tih angin thupek hi chhuah a ni tih a tar lang.
Lucknow-ah pawh sikul chawlh hi pawh sei a lo ni tawh a, January 10 thleng pre-primary leh pawl riat inkar chawlhtir an lo ni tawh a. Pawl kua leh 12 inkar, sikul kai tura tihte pawh an sikul kai hun sawnin chawhma dar 10:00 leh tlai dar 03:00 inkar a ti a ni.
Delhi-ah pawh sikul thlasik chawlh chu Ningani thleng atan an pawt sei tih Directorate of Education (DoE) chuan a puang a. Haryana-ah pawh Directorate of School Education chuan sorkar leh mi mal sikul zawng zawngte chu Ningani thleng thlasik chawlh pawh sei a nih thu a hriattir bawk.
Jammu & Kashmir-ah chuan pawl riat leh a hnuai lam chin chawlh pawt seiin March 1-ah chauh tan turin a ti a. Pawl kua chung lam erawh February 22-ah tan turin a ti.
Tripura-ah pawh state sorkar chuan sikul thlasik chawlh hun hi a lo pawt sei tawh a, kar hmasa Thawhlehnia kai tan tawh tura tih kha ni tawh mah se Inrinni thleng pawt seiin Thawhtanni atang khan an kai tan chauh a ni.