Khawhai ramah alu ching chhin

Krishi Vigyan Kendra, Khawzawl leh ICAR- Central Potato Research Institute (CPRI) Shillong tangdun chuan Khawhaia Tawitawzawl Zauah Nilaini khan ‘Field Day on Potato’ an hmang a. KVK Khawzawl head, senior scientist Dr Malsawmkimi kaihhruai programme-ah hian CPRI Shillong atangin senior scientist Dr Ngursangzuala leh NABARD district development manager Lalhmachhuani te pawhin an hmanpui.
Tawitawzawl zauah hian tunhmain alu an la ching ngai loa, 2023 January atang khan KVK hian alu variety – Kufri Megha chu CPRI nen tangdunin an chin tir a. Zirtirna pein a hmunah an enkawl pui a ni. A bultanna atan mi 4-in an chin hnuah 2023 December atang khan mi 20 chintir leh an ni. Hectare 18 vela zauah alu chin a ni a, quintal 105 chin zingah quintal 75 chu IARI (ICAR) hnuai ami niin, quintal 30 chu CPRI Shillong kaltlanga chin a ni. Variety an chintir hi Kufri Jyoti, Kufri Pukraj (thlasik leh nipuia chin chi variety) leh Kufri Chipsona an ni.
KVK Khawzawl hian alu an chin leh huna an buai loh nan loneitute alu tharchhuah hi Khawzawl KVK Complex-a cold storage-ah engemawzat dahthat sak an tum a. Alu quintal 500 tal chu Tawitawzawl Zau atang hian tharchhuah an inbeisei a ni.