Khawhaiah Remna Kut hmang

Khawhaiah Remna Kut hmang
Tourism department leh Khawhai khawtlangin an buatsaih, Remna Kut (Peace Fest) 2025 chu ni hnih chhung Khawhaiah neih a ni.
Kum 133 kaltaa Dawn pasalthate leh lal Nikuala khua Chawngtlai pasalthate inbeihna hmun, ‘Pawi thah kawn’ Khawhai tlangah Remna Kutah hian inremna sa-ui tan a ni a. Sa-ui tan tur hian Myanmar Dawn khua atangin palai 30 chuang an lokal a, pasaltha hruaitute ve ve, Dawn pasaltha Ralbila leh Nikuala pasaltha Chawngluta thlahten inremna hi an siam. Pasaltha Ralbila thi pawh a thlahte hnenah pek let leh a ni a, Dawn khaw lamah an hawn hnuah hun remchang hmasa berah Aizawl-a State Museum-a dah tura ruahman a ni.
Kut hman chhung hian programme hrang hrang – Peace concert, nghakuai chiah runpui leh hnam ziarang pholang thei hrang hrang hman a ni a, naupang intih hlimna chi hrang hrang buatsaih a ni bawk.
Remna Kut hi adviser to chief minister (Political) Lalmuanpuia Punte chuan a hmanpui a. Remna leh muanna a hlu em em a, Mizoram-in remna leh muanna hlu tak a neih khualzin hipna atan hman nachang an hria chu fakawm a tih thu a sawi. Remna Kut chu Zofaten remna leh muanna hlut zia kan hriat lehzual theihnan hmanraw tangkai tak a nih a beisei tih a sawi bawk.