Khawlaiah ruihhlo leh a rui \hinte zalen

Aizawl khawlaiah ruihhlo leh a rui thinte an zalen a, hei hi thil thar a ni lo. Tun hnaiah an zalen zual emaw tih tur khawpin khawlai a lun a, tun karah, a bikin Nilaini-ah phei chuan ni dang aiin an thahnem niin a lang.
Aizawl khawpuia hmun lun ber ber hi hun engemaw chen chu ruihhlo zawrhna hmun a ni tawh a, a zuar duh leh a lei duhte zalen takin chhun zan zawmin an kalkhawm thin. Chung hmun leh hmun dangah pawh khawlaiah an inchiu nghal mai a, kawng sirah rui muthlu lawp lawp an awm reng. Aizawl hmun lun laiah hian chhun pachangah pawh inchiu lai leh rui lai hmuh tur an awm reng tia sawi ngam a ni.
“Han kal mai a remchan avang hian hmun lun lai hi kan pan lo thei lo a. Aizawl chhungah hi chuan ke pawhin kan kal thei mai a. Hmun hla taka kal aiin a awlsam a, chu chu khawlaia kan punkhawm thin chhan ber hi chu a ni ang,” Vanapa Hall bula ruihhlo khawih thinte chuan an ti.
An lei a, hmun biru deuh lai chuh lova hmun lun laia an khawih nghal mai thin chhan an sawi a, “A then hi chu hawna tur neih loh vang te a ni ang a, a then chu an lo suffer vang te, suffer dawn vang te a ni ang a. Bakah neih tawh chuan hla deuha kalpui kher lova ruih nghal te kha a lo chakawm a,” an ti.
A zuarte leh a lei thin, hemi chungchanga biakpawhte chuan Aizawl hmun 10 vel, zalen taka ruihhlo an lei theihna hmun hi an sawi a, a zuarte tan leh a lei duhte tana han kal mai a awlsam vang a nih thu an sawi.
Zanah aiin chhunah ruihhlo lei a awlsam zawk thu an sawi a, zanah chuan ‘duty’ an awm a, chhunah an zalen zawk tih an sawi.
Heroin zuar sawi nan ‘vawrh’ tih tawngkam an hmang a, ‘vawrh’ hi ‘regular’ chu an tam vak lo a, a remchan dana ‘vawrh’ an tam an ti.
Ruihhlo tite sawi danin, tunlaiin khawlaiah heroin hi tic tac 1 Rs 2500 man a ni tlangpui a, thenkhat tan ni khat tla pawh a nih loh laiin thenkhat tan chuan ni hnih pawh a daih. Mahse ni hnih daih tur chuan ‘dose’ hniam tak nih a ngai. Tic tac hnuaiah hian chhin sen a awm leh a, chhin sen 1 hi tunlaiin Rs 700 te a ni. Dose sang tan chuan chhin sen 1 hi vawi khat tih a ni chauh.
Aizawl khawpuiah chuan heroin hi zalen taka an zawrh bakah zalen takin an rui a, hmun lun ber berah hmuh hrehawm tak tak hmuh tur a awm thin. Vanapa Hall bul vel leh hmun dangte pawh kea kalte tana hrehawm khawpin ruihhlo a zalen a, zing kar atangin an fuankhawm thin.