Khawpui Chuap

Ram changkang zawkte chuan khawpui chhungah hmun hring zau tak tak (Urban Park etc.) an zuah thin. Chu’ng ram hringte chuan boruak chhia (Carbon dioxide) hip ralin, mihring leh nungcha dangten thawk nana kan hman boruak tha (Oxygen) an thaw chhuak leh a, chu chu ‘Khawpui Chuap’ (The Lungs of the City) tiin an sawi thin.
Aizawl khawpui pawh hian ‘Khawpui Chuap’ tih ve mai theih tur a nei ve nual a, chung zinga khawpui laili taka awm chu, tuna sipaiin chhuahsan an tum tak Assam Rifles ram hi a ni. Helai hmun hi Bethlehem Branch YMA ten kum 2008 atanga “Aizawl Chuap” hming phuaha hma an lo lakna rah a ni a, Bawngpu par hmun kha ramngaw tha takah an siam a ni.
Assam Rifles te hi insawn chhuak mai tur an nih tawh avangin, an chhuahsan ram hring tha tak hi khawih chhiat a nih mai loh nan leh kawng hrang hranga a pawimawhnate hai chhuak chungin, tun hnai khan Centre for Environment & Social Justice (CESJ) chuan helai hmuna thing chhiarpui leh zirchianna an nei a, chuta an hmuhchhuah chu — He thing hmun hian carbon dioxide (CO2e) 5766.73 bawr vel a hip lut, tih a ni a. Hei bakah hian thing chi hrang hrang 480, species 80, family 31 leh genra 59 awmin, heng zinga chi (species) 4 chu venhim ngai bik thing (critically endangered) a ni a, riral hlauhthawnawm chi khat a awm bawk a, dinhmun ngaihtuahawm chi 5 awm bawkin, ramhmul damdawi chi 71 zet a awm bawk a ni.
Zirchianna lehkhabu tlangzarhtu chief minister chuan, hmasawnna hna thawhte hi khuarei daih leh leilung tichhe lo thei ang ber an ni zel tawh tih sawiin, hmasawnna kan duh a, hmasawnna hnate hian environment a nek bawk si avangin hmasawnna man pek hi a ngai ve tih kan hriat a tha a ni, tiin a sawi a.
Ni e, hma sawn zel hi a ngai thin, amaherawh chu, hmasawnna kan din tur leh hmasawnnain environment a tihchhiat tur hlutna hi kan buk fo erawh tihmakmawh a ni. Hei hi namnul chi a ni lova, science leh technology thiamna hnuaia khawsa kan nih tawh angin, hma kan lakna tur hi a theih chin chinah scientific taka tih ve zel a tul tawh.
Tuna CESJ hovin hma lam hun thui tak thlir chunga sipaiin an chhuahsan mai tur ni tawh AR ram chhunga thing leh hnim dinhmun an lo zirchiang thlip thlep hi, hetiang zawnga hmalakna awm hmasa ber a ni hial awm e. An zirchian ram zau zawng hi 16.9 Hectare (Metre 411 bial) a ni a, he thing hmun hi kawlh ta vek mai se, boruak chhia (CO2e) 5766.73 hip botu tur a awm loh chuan boruak a chhiat phah mai bakah boruak lum hreawm tak kan hmachhawn dawn tihna a ni mai awm e.
Khawpui Chuap dang siam belh kan mamawh em em laia a awm sa kan tichingpen mai a nih chuan, lu chunga mei ling chhek ang mai kan ni dawn tihna a ni. I ngaihtuah chiang ang u khai!