Khawpui fai ber nih Siaha-in lawm

Khawpui fai ber nih Siaha-in lawm
Mizoram khawpui fai inelna 2025-a pakhatna Siaha district a nih lawmna chu Thawhlehni khan Siaha-ah hman a ni a. Mara Autonomous District Council chief executive member M Laikaw leh district bawrhsap VL Hruaizela Khiangte ten an hmanpui.
MADC CEM chuan an dinhmun atang hian tlahniam tawh lo turin tang mar pat turin mipui a sawm a. District huapa lawmman lak bakah khua leh veng bil anga lawmman lak tuma tan la thar turin a fuih. “Kan khua a fai chuan kan district a fai anga, district zawng zawng kan fai chuan state fai kan nih leh anga, chu chuan India ram chu ram dangte entawn tlak khawpa fai leh mawiah a siam dawn a ni,” a ti.
Bawrhsap pawhin, faina an ngaihpawimawh avangin kumtluana fai an tum a, vartianah tual phiat pawlin an phiat a, kawngkama lirthei inhung rei tawh leh in sakna bungrua chhek rei tawh endik pawl an awm bakah thutkhawm leh rorel a tam a. DC office leh MADC an thawkho tha a, tlawmngai pawl leh mipuiin an thlawp that avangin pakhatna lawmman an la thei tih a sawi a ni.
MADC executive member i/c LAD K Chhuabei chuan, khawpui fai nih tumin CEM leh EM quarters atangin bul an tan a, quarters ram chhunga ran vulhna in zawng zawng thiah tir vek a ni a. Roreltute atanga faina bul tan a nih avangin khawtlang mipuiah hnathawh a nuam em em tih a sawi. Siaha khawpuia plastic tuium paih tawh lei khawm mek a ni tih sawiin, “Recycle theihna tur khawl bun mek a ni a, nakinah chuan khawlaia plastic bawlhhlawh paih mai mai a tlem sawt a rinawm,” a ti.
Khawpui fai inelnaah hian mark hmuh theih hi a pumpuiin 4500 a ni a, Siaha district hian 3485 hmu in, pahnihna nena an inthlauhna chu 658 a ni.