Khawpui fai ber nih tumna…

UD&PA, Aizawl Smart City, AMC leh Central YMA tangkawp, Aizawl Khawpui Faina atana Coordination Committee buatsaihin Aizawl Khawpui Faina Hnatlangpui chu vawiin March ni 28,2026 hian neih a ni dawn a, Aizawl khawpui chhung YMA branch 111-ah neih tur a ni ang a. Hei hi India rama khawpui fai ber nih theihna tura hmalakna a ni. Coordination Committee chuan mipuiten mahni zawn theuha theihtawp chhuah ve a, mahni veng theuhah he Faina Hnatlangpui hi lo thlawp a, lo thawk chhuak ve theuh turin a ngen nghal a ni.
Ram pakhata khawpui fai ber nih tumna rilru kan pu hi a lawmawm hle a, kan beih tak tak chuan ‘fai ber’ hi kan ni thei ngeiin a rinawm.
Chutih rual erawh chuan, fai kan tum dan hi bawlhhlawh thian faia hnatlang neih tlut tlut zawnga hmalakna hian a daih rei ang em? tih hi ngaihtuah theih tak a ni.
A chhan chu, then fai tur bawlhhlawh a awm hner hnur reng mai chuan, han thian fai sa teh thin mah ila, then fai loh hun hunah a bal tawp leh thuai dawn tih a chiang. Chuta pawimawh ber chu, then fai tur bawlhhlawh awm lo tura mipuiah ‘civic sense’ kan tuh ngheh hmasak a ngai, tih hi a ni.
Mizorama kan kalphung dik lo tak pakhat chu, a bulthum (grassroot level) lam uluk hmasa lova, a ler lama thuai nghek kan ching thin hi a ni. Zirna lamah ni se, elementary stage-ah kan uluk lova, higher stage-ah namen lovin kan tang leh a, a lo sak talh tawh a. Result tha neih loh hlauvin zawhna hlui kan zawng khawm a, exam oriented-in naupang lehkha kan zirtir a, tam tak chuan thiamna tak tak (in-depth knowledge) nei si lovin, mark sang tak tak hmuin grade sang tak tak an hmu a. A chung lam zirna sang zawkah an buai phah a, tam takin an beidawn phah a, hun rei tak chhung sum leh pai, tha leh zung seng chunga an lo zir tawhna zawng zawng kha a tawpah hman tlak lohvin a chhuak leh mai thin.
Chutiang bawk chuan, kan chenna in bul, khawlai, tuiluankawr, etc.-ah bawlhhlawh chi hrang hrang a awm chhan chu, ‘hetiang hmuna bawlhhlawh paih hi a dik lo a ni’ tih a bulthum atanga thisena kan thanhnan loh vang a ni. Hmun thenkhatah chuan, zirna school bul hnaiah eitheih funna kawr chi hrang hrang a darh nuaih thin a, chung bawlhhlawh paihtute chu zirlaite an nih chuan, zirtirtuten civic sense an fah ngai lo em ni tih a awl khawp ang.
Faina hnatlang neih hi a tul a nih chuan nei zel ang u, mahse hnatlang neih ngai renga kan awm chhan lam chinfel kan tum leh si lo a nih chuan, kan bawlhhlawh reng ang a, kan fai lo reng mai dawn a ni.