Khawpui luhka pawimawh

Rangvamual leh Punchawnga dan kalha eizawn nana zu thlawr thinte tana eizawnna dang ruahmansak dan tur ngaihtuahtu Core Committee on Mission Chhanchhuahna chuan tunhnai khan Rangvamual leh Punchawng mipuite pualin kawng inkawhhmuhna awareness campaign an nei leh a. Hetianga hmalakna neih a ni chho ta hi a lawmawm hle a; hei hi a taka a hlawhtlin ngei theih nan mar pata awmze nei taka hmalak chhunzawm zel a pawimawh hle ang.
Rangvamual leh Phunchawng hi khawpui luhka pui bera awm a nih avangin Mizoram hmelhmang lanna pawimawh tak a ni nghal a. Mizoram rawn tlawhtu ram pawn leh ram chhung khualzin tam zawkten khawpui an luh dawna an paltlang ngei ngei ngai a nih avang hian ‘khualchhawntu’ an ni ber a. Khualchhawntu dinhmun chu kan hre vek a; nalh leh mawi takin, rimtui takin, hmuh nuam takin an lo inbuatsaih thin a nih hi.
Khawpui dangah chuan a tlangpuiin airport atanga khawpui panna kalkawngah khualzinmite khawhai tinuam turin hmunhma an cheiin thlenna hotel nuam tak takte kawnglakah an chhawp thliah thluah thin a, chu chu tourism promote-na pawimawh em em a ni. Tourism development-na kawngah hian, a hmatawng, khualchhawntu, a kailawn rahbi hmasa a fuh loh chuan thildangah a fuh zui tak tak thei tawh lo. Sap tawnga ‘first impression’ an tih fo pawimawhzia hi kan man fuh a ngai.
Rangvamual leh Phunchawnga zu thlawr/zuar thinte eizawnna dapsak an nih rual hian, helai hmun vawn thianghlim zuina kawngah khauh taka dan kenkawh zui dan tur felfai taka ruahman zui a pawimawh nghal bawk awm e. Khual lian deuh leh programme lian deuh (G20 Meeting etc) thlen dawn apianga khuh mawi chawp ngai anga awm kha a hahthlak a, a zahthlak bawk.
Hei bakah hian, Aizawl khawpui vet chhuaka kawngpui (ring road) neih hi tihmakmawh a ni. Leimin nikhuaa airport kawng a ping zel a nih chuan, harsatna kan insiam zel mai dawn tihna a ni. Khawpui luhka hi hmun tin atanga luh leh chhuah theiha siam a pawimawh a ni.