Khawpuia hmeichhiate himna ber Mumbai & Kohima

Khawpuia hmeichhiate himna ber Mumbai & Kohima
Kohima, Visakhapatnam, Bhubaneswar, Aizawl, Gangtok, Itanagar leh Mumbai te chu India rama hmeichhiate himna ber khawpui an ni a. Hetih lai hian Patna, Jaipur, Faridabad, Delhi, Kolkata, Srinagar leh Ranchi te chu an him lohna hmun niin National Annual Report & Index on Women’s Safety (NARI) 2025-ah tar lan a ni
Ram puma hmeichhiate himna dinhmun zir chianna hi khawpui 31-a hmeichhia 12,770-ah neih niin ram pum hian 65% a hmu pha a. A him dan sawi nan hian ‘him tha tak’, ‘tha tawk’, ‘him lo’ leh ‘him lo tak’ tia then a ni.
Hmeichhiate himna ber, Kohima leh khawpui dangah hian hmeichhia leh mipa an intluk tlang a, khawtlangah an inhmang tam a, police-a thubuai leh hmeichhiate hman theih thil a tam a ni.
A hniam lam, Patna leh Jaipur angah erawh inzirtirna a tha lo va, mipa rorelna chhungkua an nih avangin mipa thuneihna a sangin an thil dinah pawh hmeichhiate tana remchang ngaihtuah a tlem a ni.
Zir chianna neihah hian hmeichhia 10 zela paruk chuan an awmna khawpui chu ‘him’ tiin an chhang a, 40% chuan ‘him tawk lo’ leh ‘him lo’ niin an sawi thung.
Zan lama hmeichhiate himna a hniam leh tih zirnaah hian hmuh a ni bawk a, a bikin vantlang inkalpawhna hmanrua leh intihhlimna hmunah a ni zual a. Zirna in (86% him)-ah pawh chhunah chuan hmeichhiate an him hle laiin zan lam leh zirna kalpui loh lai chuan an him lo hle tih a lang bawk.
An hnathawhna hmun a him nia ngai 91% an awm laiin a zahve aia tam chuan an hnathawhnaah hian POSH (Prevention of Sexual Harassment) policy a awm leh awm loh an hre miah lo thung.
Hmeichhia pali zela pakhat chauhvin thuneitute hnena an himna chungchang thlen chuan awmzia a nei niin an sawi a. 69% chuan tuna himna tura hmalakna chu tha tawk an tih laiin 30% chuang hretin hlawhchhamah an ngai a; 65% chuan 2023-24 chhungin an himna kaihhnawihah hmasawnna tam tak a awm niin an ngai.
Hmeichhia 7% chuan kum 2024 chhungin vantlang hmunah tih (harassment) an tawk niin an insawi a, hei hi kum 24 hnuai lamah phei chuan a leta tamin 14% a kai.
Veng chhung (38%) leh vantlang inkalpawhna hmanrua (29%) chu hmeichhiaten mi dang laka khawih an tawhna tam ber a ni a. Heng tawk zinga pathuma pakhat zel chauhvin thuneitute hnenah an thlen.
Report-ah hian thuneituten pawikhawihna an chhinchhiah chu a tak taka hmeichhiate nun tar langtu a tling zo lo niin an tar lang bawk.
“Khawlaia khawih tawk pathuma pahnihin engmah an sawi lo va, heti a nih chuan National Crime Report Bureau (NCRB) hian hmaih a ngah dawn hle tihna a ni,” tiin an sawi.
NARI index hi Pvalue Analytics, The NorthCap University leh Jindal Global Law School ten an buaipui niin Group of Intellectuals and Academicians (GIA)-in an tihchhuah a ni thung.