Russia laka hrekna kalpui chu nasa zawka tihpun niin UK sorkar pawhin diamond a chawkluh te khap a tum zui bawk a. Hei mai bakah hian President Putin-an indo senso phuhru bera a hman 60% vel te chu khawih chet theih loha siamin a awm tawh, a ti bawk.
-- Advertisement --
Hrekna chu eng nge?
Hrekna chu ram pakhatin ram dang hnena hremna, international law a bawhchhiat zel tihtawp nana a pek a ni.
Ramin hremna a chelek theiha khauh ber zinga mi niin indo tlukpui deuhthaw niin hrek tur thu pawh sawi vak vak pawh a ni ngai lem lo.
Eng nge diamond hrekna chu?
UK chuan Russia atanga diamond a chawkluhte a khap bur dawn ta a. US chuan nikum khan Russian diamond chawkluh a lo khap tawh a, EU pawhin a khap zui dawn bawk.
Russia hian diamond thawnchhuah atang ringawtin kum 2021 khan 4 billion pound a la lut tiin US chuan a sawi.
Mahse Russian diamond tam ber te hi ram dang India ram angah te cheimawi tura thawn thin a ni, tiin Hans Merket of the International Peace Informative Service think tank chuan a tarlang a. India ram ang atanga thawnchhuah leh a nih tawh chuan Russia ram atanga chhuak a nihna hriat a har lutuk tawh a ti.
Hei vang tak hian ‘US-in hrekna a kalpui pawhin awmzia vak a nei lo’ tiin Merket chuan a sawi a. Hei vang hian 3D scan hmangin emaw laser hmanga chhinchhiahna siamin emaw kalpui a ngai ang a ti bawk a.
Russia hian kum 2021 khan Gold pawh 14.4 billion dollar a thawnchhuak a, nikum khan UK leh US te chuan an hrek tawh bawk.
Hrekna dang Russia laka kalpui mek te?
Khawthlang ram te chuan Russia-in pawisa a duh ang thal a neih loh nan an dang chat mek a. European Union (EU), US, UK leh Canada te chuan Russia central bank account chu khawih chet theih lohin an dah mek a ni.
Russian bank lian te chu international financial messaging system Swift hmang thei lova siam niin hei vang hian Russian oil leh gas payment tihkhawtlaiin a awm phah reng a.
UK chuan Russian bank asset dangte pawh khawih chet theih loha dahin Russian firm tena sum an puk pawh a khap bawk. EU pawhin Russian tena an bank-a deposit an tih theih chin bituk a siam bawk a.
UK sorkar chuan Khawthlang ram tena financial sanction an kalpui avang hian Russia chuan foreign currency reserve $350 billion vel a khawih che thei lo mek tiin a sawi.
Oil leh Gas
Khawthlang ramte chuan Russia-in oil leh gas atanga sum a hmuhna tihtawp tumin hma an la mek bawk a. EU chuan Russian coal leh oil chawkluh a ti tawp a. US leh UK chuan Russian oil leh gas chawk luh an ti tawp vek bawk a. Germany chuan Russia atanga gas pipeline Nordstream 2 chu a ti tawp bawk.
December 2022 khan EU leh G7 te chuan Russian crude oil chu barrel ah $ 60 an chhiar bur bawk a. Hei aia man tam an pe a nih chuan importer te chuan harsatna an tawh tur thu a sawi nghal bawk a.
EU chuan Russian gas te erawh hrekna a kalpui lo thung a, a chhan ber pawh a gas mamawh 40% vel chu Russia atanga a chawk luh vang a ni.
Mimal hrek
Russian 1,000 chuang sumdawng leh mimal te chu US, EU, UK leh ram dang ten an hrek tawh a.
Heng zingah hian sumdawng lian Kremlin nena inhnimhnai nasa anga ngaih Chelsea FC neitu Roman Abramovich te pawh a tel.
President Putin leh a Foreign Minister Sergei Lavrov te asset te pawh khawih chet theih loha dahsakin a awm tawh bawk a. Russian te superyatch 16 pawh mansak a ni bawk a.
New York-ah chan Russian aluminium magnate Oleg Deripaska chu US hrekna bawhchhia tia thubuai siamsak a ni a.
UK chuan ‘golden visas’ a tih mai Russian mihausa tena British residency rights an neih theihna chu a titawp bawk.
Russian shoppers leh sumdawngte tibuai
International company lian 1,000 chuang McDonald’s PepsiCo, BH&M leh Adidas te pawh Russia atangin an inla chhuak tawh bawk a.
Hei bakah hian dual-use goods tih mai civilian leh military thila hman theih heng vehicle parts UK, EU leh US siamte chu Russia chawkluh khap a ni bawk a.
Tun thlengin US, UK, EU leh Canadian airspace-ah te Russian flights an luh remtih a ni lo bawk a. Luxury goods te pawh Russia-a thawn luh khap a ni bawk.
Hrekna-in Russia a tibuai em?
Western leaders te chuan Russia economy chu tluchhe turah an ngai a. Ukraine run hnuah leh hrekna thawhkhatna kalpui hnuah Russian mipui tam tak te chuan bank atanga an sum lachhuakin thil man a sang em em bawk a.
Mahse International Monetary Fund chuan Russia economy chu kum 2023 ah 0.7%-in a pung ang a ti thung a. A chhan ber pawh Russia chuan nikhat oil 8.3 million barrel a thawnchhuah vang niin April 2020 hnua a thawnchuah nasat ber niin a leitu lian ber pahnihte chu China leh India te an ni.
Mahse Russia-in oil leh gas thawnchhuah atanga a sum hmuh chu April 2023 khan $ 8.1 billion in a tlahniam a, a chhan ber pawh khawthlang ramte hrekna vang a ni an ti.
Russia chhanletna?
Russia chuan Khawthlang ram te thil siam bungrua hrang hrang 200 chuangte a hrek ve thung a, chung zingah chuan telecom, medical, vehicle, agriculture, electronic equipment leh timber product te a tel.
Government bonds te foreign mite lakah interest payment pek tur a dangchat bawk a, Russian firms te chuan ram pawna shareholder te sum an pek a khap bawk. Foreign investor te Russia a dollar billion tel investment tite chu an share an hralh a khap bawk.
Mahse, Russia hian khawthlang ramte leh an thawhpuite hrek tak tak turin theihna a nei vak lo thung a. Hei vang hian ram dangte ti na khawpin hma a la thei meuh lo thung a, a oil leh energy mamawhna avang erawhin thui tak a him phah thung.