Khawtina chhungkaw zahve aia tam hi NLUP dawng tawh an ni – Lalnunmawia Chuaungo
Khawtina chhungkaw zahve aia
tam hi NLUP dawng tawh an ni
– Lalnunmawia Chuaungo
Khawtina chhungkaw awm zawng zawng zahve aia tam chu NLUP dawng an ni deuh vek tih Congress hruaitu Lalnunmawia Chuaungo chuan a sawi.
Congress Bhavan-a inkhawmah MPCC senior vice president Lalnunmawia Chuaungo chuan, kum 2028-ah sawrkar siama mipui rawngbawl leh turin an inbuatsaih a ngai tih a sawi a. Congress chu mipui laka an intiamna tihlawtling thin awmchhun party an ni tih a sawi.
“Remna leh muanna a awm theihnan kan nihna kan kian ang, tiin, chu chu tih hlawhtlin a ni a; kan hotu Pu Lal Thanhawla’n a lal thuthleng a kian a. Chu’ngte chu thalaite hian an hre lo, an hre vek emaw kan tih hi an lo hre vek hauh lo mai,” a ti.
Kum 1989-ah rap ina cheng, di in a chengte hnenah Congress sawrkarin rangva inchung pek an tiam a. Chhungkua 39000 chuang hnenah rangva quality tha tak, tun thleng pawha la chhe lo, a dawngtuten an la hman reng an pe a ni niin a sawi. NLUP-ah tih tirhin chhungkua 78000 chuang hnenah an pe a. Kum 2018 inthlan hma in NLUP cheng nuai khat pek an tiam a, an sawrkara chhungkua 140000 chuang hnenah NLUP an pe tih a sawi. “Khawtinah hian chhungkaw awm zawng zawng zahve aia tam hi NLUP dawng an ni deuh vek,” a ti.
MNF chuan SEDP hmangin nuai thum chuang pek an intiam a, term an han hmang zo a. Chhungkua pakhatmahin nuai 3 an dawng lo nia a lan thu MPCC hruaitu hian a sawi. ZPM-in an hotupa hoin thiam em em maiin sawrkar kal tawhten engmah tih an nei lo, mipui retheihna thlentu an ni, tia an puh thu a sawi. “Thil an sawi thiam si, tawngkam an thiam si. Thudik lo leh belhchian dawl lo belh hret kha an hreh der si lo. Bana Kaih an ti a, mipui retheihna bawih ata kan kaichhuak dawn an ti a, enchhin sawrkar a piang a. Kum hnih dawn an sawrkar tawh chhungin Bana Kaih hnuaiah mi 181 hnenah loan sanction sak tawh a ni tih an tarlang de de chauh. Kum thum emaw an la neih chhungin eng zat tak pe hman ang maw,” a ti.
Dampa by-election neih zawh takah an tang tlang a. An pheikhai a rual a, beisei erawh an phak loa, chet fuh loh chuan sawisel tur a awm duh khawp a, chu’ng chu an tan vang a ni mai zawk tih Lalnunmawia Chuaungo hian a sawi. AMC inthlan awm turah theihtawp chhuah a tul, tiin, an tum anga rangin tho lo mah se, an tum tlat chuan an thochhuak ngei ngei dawn tih a sawi a ni.