Khawvel mihring tam zawkin boruak him lo hip lut

Khawvel mihring tam zawkin boruak him lo hip lut
Khawvela mihring tam zawk chuan boruak thianghlim lo an hip lut a, nikum chhung khan World Health Organization (WHO)-in a him chin a tih boruak nei chu ram pasarih chiah an awm.
Switzerland-a boruak bawlhhlawh dan viltu, IQAir-in Thawhlehnia report an tihchhuahah ram 138-a air quality monitoring station 40,000-a an thil hmuhah chuan Chad, Bangladesh, Pakistan, India leh Democratic Republic of the Congo te chu khawvela boruak a bawlhhlawh ber berna ram a ni.
Australia, New Zealand, Bahamas, Barbados, Grenada, Estonia leh Iceland ramte chiahin WHO-in a him chin a tih boruak chu an nei phak tih an tar lang.
Hetih lai hian ram thenkhatah chuan a vilna hi a that tawk loh avangin data a kimchang thei lo va. Africa khawmualpuiahte chuan monitoring station pakhatin mi maktaduai 3.7 vel zel vil ang a ni.
“Ram tam takah chuan data lakna tur hi a tlem hle a, Africa-ah phei chuan a hun lai mil zela tehna tha a awm mang lo a ni,” tiin IQAir-a Air Quality Science Manager Christi Chester-Schroeder chuan a sawi.
Report-a tar lan a nih dan chuan Chad leh Bangladesh chu nikum chhung khan WHO-in inkaihhruaina a siamah a him chin a tih aia a let 15 zeta tam bawlhhlawh an nei.
Chad hi kum 2022 chhunga boruak bawlhhlawh berna ram alo ni tawh a, hei hi Sahara vaivut khu leh thunun miah lova lo an hal nasat khu vang a ni.
Sik leh sa inthlak chu boruak bawlhhlawh chhan lian tak a ni tel a. Chester-Schroeder-a chuan khaw lum zelin ram kang nasa leh lian zawk a thlen zel a, hei hi Asia chhimchhak leh South America ten tuar nasa zualin boruak pawh a tibawlhhlawh nasa zual dawn niin a sawi.