Khawvel ngaihven Trump-a

Engkima Chawngthu

Tun hnaiah US President thlanna neih a ni a. Khawvel pumpuiin an ngaihven hi keini Mizote pawhin kan ngaihven ve nasa viau a ni. Kan rama inthlan tih lohah chuan Mizoten inthlanna kan tawngtaipui hnem ber pawh a ni hial awm e. US hi khawvel ram ropui bera ngaih a ni a, tun hnai chhoah hian an tlahniam ve viau a sawi a ni. Amaherawchu, khawvelah hian a elphak leh do ngam an la awm miau loh avang hian khawvel hian a ngaihven leh thlir ber chu an la ni zel chu a nih hi.
Mizote Buaipui Trump-a: Mizote hi sakhaw mi tak, Kristianna la urhsun tak hnam kan ni a. US inthlanah pawh hian a nawlpui chuan kristianna avang hian Donald Trump hi kan tan zawk tih zawng a chiang reng mai. Donald Trump hi Republican party, US a party lian pahnih zinga duhfir leh khirh zawk, sakhuana pawh la urhsun lam a ni a. Amah hian Mizote lunglen zawng tak turin Kristianna lam a rawn dah lian viau mai bawk a. Isua hming te a lam fo in, Kristian thlavang a rawn hauh nat avang hian Mizo nawlpui chuan kan tan ta viau mai a ni. Trump-a eptu pawl, Democrats pawl lam lah hi thiangzau, nau tihtlakte pawh pawi ti lo, neih inang inkawp pawh pawi ti lo an ni bawk nen hian heng thiangzau hi Mizo tam zawk hian kan ngaina thei tlat lo a ni. Tin, Mizo zinga Trump-a tantute hian an tan lam hi an sawi mawi thiam in, awihawm leh pawm nuam tak turin Trump-a lam hi an sawi ve bawk a. Chuvang chuan US inthlana Trump leh Kamala te inbei pawh hi Pathian pawl leh Setana pawl inbeihna ang hiala kan ngai pawh hi a mak viau lo. Mizo chauh hi kan ni lova, Pathian thu atanga hrilhlawkna dawng thenkhat pawh hian hetiang deuh a sawi hi an lo awm ve tho mai.
Mizo zingah tlema lehkhathiam leh chhiar zau thenkhat hian Trump-a nun hlui leh mizia avang hian Trump-a mi thianghlim ang thawthanga Mizo mipui tam takin kan chhuah hi ei lo leh pawm lo tam tak an awm ve bawk a ni. A nawlpui erawh chuan Kristianna tarmit atanga kan thlir hian Trump-a hi Kristianna chawinung leh vawnghim theitu pawimawh takah ngaiin US President a tlin theihna tura Mizoram atanga tawngtai pui pawh hi an tam viau reng a ni. A nun hlui leh a khawsak dan en hian Krista kross hian a hneh viauin lang lo mah se, Isua zahpui lo leh amah ringtu nih zak lem lo President a nihna lai hi erawh a lawmawm ve hrim hrim a. Tirhkoh Paula pawhin a der pawh nise Krista chanchin tha hrilh darh a ni hrim hrim hi a lawmawm viau alawm a tih ang dungthulin, Trump-a hian a takin Kristianna nunpui viau lo mah se Krista a zah pui lohna hrim hrim pawh hi Mizo te tan chuan an lung ti lengtu a ni ve tlat. A dik tak chuan US inthlan lai hian Mizoram chhungah Sinlung Hill Council-a inthlanna neih a ni a, New Vervek vela vote chhiar aiin New York lama vote chhiar chu a nawlpui chuan kan ngaihven deuh zawk a nih kha maw.
Chuai thei lo Trump-a: Kan hriat theuh angina Trump-a hi mi hausa tawntaw, pa phunglung leh nun uluk lutuk lem lo a ni thin. Mak tak maiin kum 2016 khan US President atan thlan tlin a ni nawlh mai a. Ani hi sumdawng hausa a nih bak a hma lamin state politics emaw an dan siamtu Congress lama emaw pawh sulhnu a nei lem lo. A sum hmachuan vang ni miah lovin, a mizia mak leh phunglung tak hmang hian a rawn inzuar a. Republican candidate tam tak zingah a dawk zawk a, President turin an candidate ta mai a. Kum 2016 khan Hilary Clinton, khawvela hmeichhe smart ber pawl nen an inkhing a. Mipui ngaihdanah Hilary hi a hneh lo viau a, inthlan result a chhuak a, mak tak maiin Trump-a lo tling ta nawlh mai a ni. Hetia a tlin theihna tur hian America a Kristian duh urhsun pawl te hi an pawimawh viau in an sawi. Kum li ro a rel a, a phunglung zia avangin US mipui ngei a hlawh hman viau a. President inthlanah a chak lo a, a hmingchhe viau bawk a, case te hial a nei ta a. A rorel lai term khat chhung lek hian impeachment pawh vawi hnih lai a tawng hial a ni. US President vawi hnih impeachment an tih hi tumah an la awm lo.
Kum 2022 a lo hre chhuak a, Trump-a hian US President ka chuh leh dawn a ti leh ta mai a. An ti nek nek a, Republican party atanga President chuh tum tumah in Trump-a chu an khum leh ta lova. President turin an chhawp chhuak leh ta a ni. A hma lawka lungten a an hnawl tak kha a ni a. Mahse, an President hrawn lai hi beisei a phak tak viau lohah chuan an duh loh hnu khan an lung a len thar leh ta niin a lang. Tun tum 2024 inthlanah hian hmeichhe candidate bawk Kamala Harris hi mipui ngaihdanah a hneh lo chho ngar ngar a, mahse inthlan result a lo chhuah leh meuh chuan mi ropui Trump-a bawk hi a chak leh ta daih a ni, hetiang tura amah leh a team ten an thawh nasat dan tur hi a ropui thlawt a ni.
Khawvel barakhaihtu Trump-a: Khawvel danah chuan Trump-a hi US President a nih leh theih hi a rinawm tawh lo a ni. Kum 2020 inthlanah mualpho takin mipui in an hnawl a. A tir atanga mipui ngaihdan leh inthlan result-ah khan nasa takin a hneh lo a nih kha. Chumi zawhah 2021 January thla ah Capitol Hill mipuiin an luh chhuah chungchangah mualpho takin a awm a, a hnuah case te hial siamsak a ni a. Mahse, kum rei lote a vei a, President a rawn chuh leh mai a. President a chuhna kawngah pawh a hma lama a lo hmingchhiat avang hian Republican party hian seat pawh an pe duh dawn emaw ni tih turin a ni. Mahse, party chhungah chak tak maiin, tumah chelh rual lohin a rawn invawrh a. Inthlanpui tura mipui ngaihdan a hniam ber ni char charin hneh takin a rawn tling ta mai hi khawvel hian mak a ti tak zet a ni.
Tin, tun inthlanah hian mi tam tak chuan Kamala Harris chak turin an sawilawk hlawm a. Kum tam tak US inthlan lo sawi diktute, Cartoon lama an sawi lar Simpson-ah pawh Kamala Harris tling turin an sawi lawk a, Mizo zingah pawh Kamala tlin ringa lo sawi lawk te pawh an awm karah hneh taka maia Trump-a a tling hi khawvel leh Mizote pawh hian mak kan ti a ni. Tunlai khawvel hi a mak khawp a, hmanraw changkang hmangin hrilhlawkna leh hmathlir pawh dik zawkin an siam tawh lai hian tun hnaiah hian inthlana mipui ngaihdan latute hi mipuite hian kan bum ta fo zawk emaw tih tur a ni.
India inthlanpuiah BJP in seat 400 la mai turin an hrilhlawk a, seat 300 pawh an hmu lova. Haryana ah Congress chak turin an hrilhlawka BJP an chak chiang hle a, US inthlanah Kamala tling turin hrilhlawk vek ni mah se Trump-a chak ta bawk nen. Thil hi a chang chuan hriatthiam a har thin a ni e.
Khawvel thlir rawn Trump-a:
Donald Trump hi pa thawm nâ, pa huaisen leh chak tak ni hian hriat a ni ve a. An sawi danin a President lai hian khawvelah buaina pawh a reh deuh duk angin an sawi a. A hma chiah ami Obama hun laiin Russia-in Crimea a run a, a hnua President Biden-a hunah Russia-in Ukraine a run leh a, sawi tur tingin Trump-a hunah hian inrun a awm lo niawm tak a ni. Hei hian Trump-a huhang natzia leh thiltih theihzia sawifiah nan an hmang thin. Tunah pawh hian a lal huna a tih tur tam tak a sawi a, Trump hi Muslim ram ngaisang lo tak mai a ni a, a rawn lal hian indo te hi a pung thut mai ang em tih te pawh zawhna a lian viau a. Khawvel ram tam tak chuan Trump-a hi beiseina sâng tak nen an lo thlir laiin a then lo huphurh tak tak pawh an tam viau dawn a ni. Ram chhung himna leh America tih chungnunna kawngah pawh tuna mite letling thawka chet a tum avang hian lawm fe fe leh huphurh fe fe pawh an tam viauin a rinawm a ni. A tawng chaltlai anga deuh a, a chet vaih chuan khawvel hi chuan an buaipui viau loh pawhin an thlamuanpui viau mai thei a ni. Trump-a second inning hian eng tak rawn thlen ang maw le?