Khawvela ar upa ber a thi

Guinness World Records-in khawvela ar upa bera an puan Peanut chu December ni 25, 2023 khan Michigan, USA-ah a thi a, kum 21 leh ni 238 a upa a ni. Peanut neitunu Marsi Darwin chuan a arpui thi chungchang hi a blog-ah puangin, “Peanut hi kan chhungkaw zinga mi ang mai a ni a, min kalsan ta hi kan tuar hle a ni. Artui heng ka kheuh hawn atanga a rawn keu atang khan kum 21 leh a chanve chu a lo ni ve reng tawh mai, ar-ah chuan a damrei hle tih ka hre tho nain, rilru a na duh hle mai,” a ti.
Peanut hi a puiin a hruai duh loh avangin Marsi hian an chaweina room-ah vaki khawina bawkah kum hnih chhung a enkawl a, chumi hnuah pawn lamah, ar dang zingah a dah chhuak ve ta chauh a ni.
Peanut hi vawi tam tak a tui hman a, a tui pawh vawi tam tak a awp keu hman a, a lo upat ve tak deuh hnuah Marsi chuan in chhungah a dah leh ta a ni.
Marsi chuan December ni 24 zan khan Peanut chu blanket a tuamin a mutpui niin a sawi a, “Ka kokiah a lu a rawn nghat a, chutiang chu a mut thin dan tho a ni, tichuan zing dar 5 velah ka nghawngah a rawn tawlh thla a, a thi tih ka hre ta a ni,” a ti.