Khawvela camera tê ber Chi fang khat tiat lek!

Khawvela Camera tê ber chu chi fang khat tiat leka lian a ni a. Camera hming hi ‘OV6948’ tiin an vuah a, US-a bu khuar company pakhat OmniVision Technologies Inc. kutchhuak a ni a, vantlanga lei theiha chhawpchhuah zingah a tê ber a, a len zawng hi 0.575mm x 0.575mm a ni. Mizo tehkhawng hmangin sawi dawn ta ila, chi fang khat tiat a tih theih mai ang a; chu chu Sût khat (1mm) hi a laiah phel ila, chutiang tiat chu a ni. Endoscope lens hi a tlangpuiin 1-3mm vel a ni.
OV6948 hian 1/36-inch optical format neiin, video thla a lak theih hi 200 x 200 resolution niin second khat chhungin frame 30 thleng a la hman bawk. (30 frames per second). Cinematic frame rate hi 24fps chin pawm a ni a, Camera OV6948 hian cinema-a chhuah tlakin video a la thei tihna a ni awm e. (Chapchar Kut vela Cheraw kan lai thla lak nan chuan a buaithlak fu ang)
He camera hi medical equipment atan tangkai taka hman a ni a, mihring taksa chhung lam kilkhawr tak tak en theihna hmanrua atan tangkai taka hman a ni bawk.