Khawvela hruaitu pawm hlawh ber Modi

Khawvela hruaitu pawm hlawh ber Modi
Indian Prime Minister Narendra Modi-a chu ‘Democratic Leader Approval Ratings’-ah a chung ber a hauh leh ta a, mi 75%-in an pawm tih US-a business intelligence firm Morning Consult-in data a lak khawm an tihchhuahah tar lan a ni.
Survey hi July 4 leh 10, 2025 inkar khan neih neiin Modi-a hi a chung bera a awm piah lamah a dinhmun a sang fal hle a. Zawhna chhangtu palia pathum zelin Indian prime minister atan tha an ti tih an sawi a. 18%-in a hruaina chu pawm lovin 7%-in ngaihdan an nei lo.
May, 2024 atanga a hun thum nana prime minister ni tak, Modi-a hi khawvel puma mipui rorelna ram hruaitu zinga a hruai mipuite pawm ber leh an rin ngam ber a ni zel.
Union Industry & Supply Minister Piyush Goyal-a chuan, “Bharat-in khawvel huapin hma a sawn zel tih tar lanna a ni a. Prime Minister Pu Narendra Modi-a chu khawvela hruaitu rin hlawh ber a ni tih Morning Consult Global Leader Approval Rating Tracker-ah a lang leh ta,” tiin X-ah a tar lang.
South Korean President Lee Jae Myung-a chu pahnihna niin pawmtu 59% a nei a. Lee-a hi president thla khat awrh chauh la ni a ni a. Survey-ah hian 29% chu a hruaina chu pawm lovin 13%-in an ngaihdan an sawi thei lo.
Nikum atanga US president ni leh ta, Donald Trump-a chuan pariatna dinhmun hauhvin pawmtu 44% a nei a. Tun hnaia thutlukna lian tak tak a siam, a bikin ram dang laka sumdawnna thila a chetna leh tual chhunga a kal dan avangin pawmtu hi an tlem phah nia ngaih a ni.
Morning Consult hi US-a business intelligence leh data analytics firm an ni a. Global Leader Approval Rating Tracker an siam thin hi mipui rorelna rama an hruaitute an hruaiten an hmuh dan an zawhna atanga an phuah khawm niin ni sarih chhung ni tin mi sang chuang, mi chi hrang hrang ram hrang hrangah zawhna zawtin ngaihdan an la thin a ni.
Modi-a’n dinhmun sang ber a hauh leh hnua a awmna, BJP IT cell head Amit Malviya chuan, “Indian tluklehdingawn chuangin an ngainat leh khawvela mi maktaduai tel zah kai, Prime Minister Narendra Modi-a chu Morning Consult Global Leader Approval Tracker-ah a chung berah a awm leh ta a, khawvel puma hruaitu dah san ber leh rinngam ber a ni. Hruaitu chak, khawvel zah a ni a, a kutah Bharat hi a him a ni,” tiin X-ah a tar lang.
Union Minister Sarbananda Sonowal-a pawhin, “Hon’ble Prime Minister Pu Narendra Modi-a chu Morning Consult Global Leader Approval Tracker-ah a chung berah a awm leh ta a, khawvela hruaitu rin ngam ber a ni a. Indian tluklehdingawn chuangin an thlawp a. Khawmualpui pumah rawn niin a chakna, thutlukna a siamte hian Bharat hi tithovin khawvelin a zah a ni,” tiin X-ah vek a tar lang.
Zirtawpni khan Prime Minister Modi-a hian Indira Gandhi khumin India-a prime minister ni rei ber dawttu a ni chiah bawk a. Ni 4,078 chhung a pisa luah tawhin Gandhi-i kha January 24, 1966 atanga March 24, 1977 chhung, ni 4,077 chhung chhum lo chat lovin prime minister thutthlengah a thu a ni.